Iha Jenebra, Asosiasaun Mundial WAIPA prontu apoiu TradeInvest Timor-Leste

by -772 views
Foto Hamutuk.

Dili (Timor Post)— Asosiasaun Mundial husi Ajensia Promosaun Investimentu (The World Association of Investment Promotion Agencies -WAIPA), prontu apoiu TradeInvest Timor Leste.

Komitementu ne’e hatoo husi Xefe  WAIPA, Ismael Ersahin bainhira delegasaun Timor-Leste hala’o vizita offisiál iha Jenebra hodi  partisipa MC12.

Tuir komunikadu ba imprensa ne’ebé Timor Post assesu, loron 01/12/2021 haktuir, iha  reuniaun loron 29 Novembru 2021, Ajensia  TradeInvest liuhusi Diretur Ezekutivu, Arcanjo da Silva hala’o  reuniaun oras ida ho Xefe  WAIPA, Ismael Ersahin, iha sala reuniaun Misaun Permanente  Timor-Leste iha Jenebra.

Iha reuniaun nee, Arcanjo da Silva hetan akompanamentu husi Delegasaun Timor-Leste  hanesan Florencio Sanches, Diretor Ezekutivu SERVE, Milena Rangel, Diretora Jeral Asuntus ASEAN MNEK, Decio Ribeiro Sarmento, Diretor Promosaun Exportasaun TradeInvest TL,Roberto Lai, Diretor Relasaun External no Marketing TradeInvest Timor-Leste, Fernando Egidio Amaral,Diretor Agrokomersiu MAP no mós reprezentante husi Ministeriu Turizmu, Komérsiu no Indústria inklui mós Gabinete Ministru Koordenador Asuntu Ekonómikus (MCAE).

TradeInvest nu’udar ajensia ne’ebe fó asistensia serbisu ba empreza  nasionais no internasional sira apresia tebes ba apoiu husi  organizasaun internasional naun governamental WAIPA ne’ebe harí iha tinan 1995 liuhusi Konferênsia  Nasoens  Unidas konaba Komérsiu no Dezenvolvimentu nian, Nune’e liuhusi reuniaun nee, WAIPA no TradeInvest konkorda ona ho mais intensiva iha faze tuir mai hodi dezenvolve Mapa Roteiru TradeInvest nian antes sai  membru WAIPA.

“WAIPA kompremetidu sei apoiu  TradeInvest  hodi partisipa iha  eventu internasionais sira, inklui treinamentu ne’ebe organiza husi WAIPA” deklarasaun husi Ismael Ersahin reafirma kompromisu iha prósima etapa hodi nunee Timor-Leste bele hetan direitu  votu iha Asembleia Jeral WAIPA nian ne’ebe sei  realiza anualmente liuhusi Konferensia Mundial Investimentu nian.

Hodi kompleta rekezitu  legais sira antes sai membru WAIPA, TradeInvest ne’ebe atualmente tutela ba  MCAE sei hare kestoen legal sira  ne’ebe vigor ihaTimor-Leste. Hodi nune’e wainhira TradeInvest sai membru WAIPA sei la prejudika  lei sira ne’ebe eziste  iha Timor-Leste.

Iha loron hanesan 29 Novembru 2021 iha sidade Jenebra, Suísa, Ministru Koordenador Asuntu Ekonómikus, Eng. Joaquim Amaral ho delegasaun ofisialmente entrega mós relatoriu konaba progresu Timor-Leste nia esforsu hodi adere ba OMK ba Prezidente Grupu Traballu Adezaun Timor-Leste ba OMK no Reprezentante Permanente Portugal iha Jenebra, Embaisador Rui Maciera. (cao)

No More Posts Available.

No more pages to load.