Iha Grotu, Xanana: Ai-rin Orgaun Estadu Seidauk Estavel

by -174 views

Timor Post (22/09/2020)-Lider Nasional Kayrala Xanana Gusmao afirma, ai-rin orgaun estadu Timor Leste nian seidauk estavel. Tanba ne’e, nia la konkorda ho rejultadu monitorizasaun husi Organizadaun Mundial Kooperasaun Dezenvolvimentu Ekonomia (OMKDE)  katak nasaun ne’e sai ona husi estadu frajil.

Xanana dehan, nasaun ida kuandu sai ona husi lista frajil bainhira ai-rin estadu metin ona.

Xanana la ko’alia klean kona-ba pozisaun ne’e iha okajiaun hala’o assaun karitativa iha Suku Grotu, Postu Administrativu Same Villa, Munisipiu Manufahi, maibe Prezidente Partidu CNRT ne’e sublina, Timor Leste presiza Estadu ida ne’ebe metin hodi fo garantia ba nia povu tomak.

“La’os oportunu. Iha fatin ida ne’e ferik no katuas sira hein ha’u mai la’os ko’alia kona-ba ne’e,” Xanana sublina.

Entretantu Governu lideradu Taur Matan Ruak anunsia tiha ona rejultadu Organizadaun Mundial Kooperasaun Dezenvolvimentu Ekonomia (OMKDE).

Relatoriu ne’e fo sai husi Ministru Prezidensia Konsellu Ministru, Fidelis Leite Magalhaes, iha loron 18/09/2020, iha Palasiu Governu, Dili.

Fidelis haktuir, OMKDE konklui relatoriu ne’e tanba konsidera Estadu Timor Leste metin tiha ona. (cao)

No More Posts Available.

No more pages to load.