Igreja Katólika Nia Pozisaun ba New Normal

by -208 views
Padre Paulus Maya

DILI (Timor Post)—Atividade Igreja Katólika kontinua la’o normal no kontinua akompaña situasaun rai laran durante atake moras daet COVID-19. Nune’e, kona-ba new normal ka novo normalidade, governu rekomendadu tetu husi setór sira hotu.

Sekretáriu Arkidioseze Dili, Padre Paulus Maya, subliña, igreja mantein ho kontribuisaun hotu iha luta kontra moras daet ne’e. Tanba ne’e, solusaun ideal liu ba timoroan tomak simu vasina loke dalan ba new normal.

Padre Paulus kosiente númeru ema mate tanba COVID-19 kontinua aumenta, maibé tuir nia, bainhira maioria sidadaun simu ona vasina maka governu bele iha biban ho tetu hotu ba new normal alias ema hotu bele hala’o atividade ho livre ho moris foun.

“Ba oin ita haree ema ne’ebé sidauk vasina no ema ne’ebé simu vasina ona, atu evita moras ida ne’e, dalan mak vasina,” Padre Paulus subliña ba Timor Post iha nia kna’ar fatin Kâmara Ekleziástika Lesidere, Dili, Kuarta (18/08/2021).

Nia hatutan, liga ba desizaun ruma ne’ebé estadu no governu foti hodi hapara atividade sira hotu, nia hanoin, haree mós ba frekuénsia ema ne’ebé simu ona vasina no ba sira ne’ebé seidauk.

Tuir nia, se númeru vasina ne’e boot, governu sei la foti desizaun ruma atu hapara buat hotu-hotu.

“Bazeia ba deklarasaun Primeiru Ministru nian, se sidadaun sira simu vasina hotu ita tenke fila fali ba normalidade, katak sei laiha tan Estadu Emerjénsia,” tenik nia.

Nia salienta, governu mós haree ida ne’e, agora sidadaun sira partisipa ona iha vasina, sira kuaze porsentu 40 ba leten ona, nia hanoin katak metade husi populasaun kontribui ona.

Tanba ne’e, governu atu foti desizaun ruma sei tetu no haree, husi parte hotu-hotu, liga ho parte ekonomia, polítika no buat sira seluk tan, atu labele afeta ba povu nia moris.

Nia hatutan, haree ba gravidade husi situasaun ne’e, se nia gravidade boot, ba igreja hakarak ka lakohi tenke kontribui ba ema hotu nia di’ak, igreja liuhusi dioseze dezde tinan 2020, iha fulan Marsu igreja foti desizaun hodi suspende atividade hotu, liuliu misa no atividade seluk tan, ne’e katak kontribuisaun boot ida igreja halo.

Maski desizaun sira ne’e sai, mezmu tenke hasoru dezafiu sira ne’ebé iha, maibé ida ne’e desizaun ida ne’ebé hasoru obstákulu boot, nia benefísiu ba ema hotu.

Aleinde ne’e, buat sira ne’ebé dioseze halo no igreja halo mak ne’e kontribuisaun no kolaborasaun ho buat hothotu ne’ebé estadu no governu deside.

Ikus liu, nia dehan, Dioseze Dili la’o tuir situasaun no gravidade de’it, situasaun ne’e la’o oinsá, saida mak sei foti haree ba gravidade.

Entretantu kona-ba new normal, governu liuhusi reuniaun interministerial mos diskute ona medida sira molok foti desizaun.

Tuir dadus atual iha mundu rejista iha loron 18/08/2021, ema infetadu hamutuk 209,619,484, mate 4,399,007 no rekoperadu 187,871,041.

Inkuantu husi númeru ne’e, Timor Leste rejista ona ema infetadu hamtuk 13,155, mate 40 no rekoperadu 10,608. (gil)

No More Posts Available.

No more pages to load.