Ida Mate, Kandidatu Funsionáriu Na’in-92 Kontinua Ezije Direitu ba Ministru Armindo Maia

husi -431 views

Timor Post (03/03/2021)—Kandidatu ajente administrasaun públika na’in-92 ho grau III  to’o  V ne’ebé pasa iha konkursu públiku iha tinan 2019, husu ba Ministru Edukasaun Desportu no Juventude  (MEJD), Armindo Maia atu prosesa lalais sira nia kontratu serbisu.

Kandidatu sira lolo’os hamutuk 93 maibé na’in ida ho naran Jacinto Gusmão hakotu ona iis iha loron 18 Fevereiru 2021.

Portavós Adelino “Halesma” Pires afirma vaga ne’ebé loke iha mandatu Eis Ministra Edukasaun, Juventude no Desportu, Dulce de Jesus Soares  hola parte hosi Komisaun Funsaun Públika (KFP) hodi garante kualidade, imparsiál no independente no akompaña prosesu ida ne’e to’o rohan.

“Ami ezije ba Ministru Edukasaun, Juventude no Desportu atu prosesu lalais ami nia kontratu hodi labele dezvaloriza ami nia direitu iha rai ida ne’e no husu atu prosesu lalais ami kandidatu ajente administrasaun públika na’in 93 nia kontratu,” Portavós kandidatura ajente Administrasaun Públika MEJD, Adelino “Halesma” Pires, hato’o hosi  konferénsia imprensa iha Jardín 5 Maiu, Faról-Dili, kuarta ne’e.

Kandidatu ajente administrasaun públiku ne’e brevemente husu ba Konsellu Ministru  bainhira MEJD aprezenta projetu rezolusaun atu foti desizaun, tenke afavor ba sidadaun nia direitu hodi labele dez-valoriza sidadaun nian iha rai ida ne’e.

Iha oportunidade kandidatu sira hato’o sentidu kondolénsias sia nia kolega Jacinto Gusmão ne’ebé mate ona.

“Ami hakarak hato’o ami sentidu kondolénsias profunda ba kolega Jacinto Gusmão “Lorico” ne’ebé fila hikas ba Aman Maromak nia kadunan santa iha loron 18 Fevereiru 2021. Jacinto Gusmão “LORICO” nu’udar membru juventude OJETIL ne’ebé iha tempu rezisténsia hamriik iha liña frente hodi hakilar ba Timor Leste nia independénsia, tuir konkursu no pasa ona iha MEJD, maibé ladauk servisu too mate”, espresa portavós ho triste.

“Ami nia rekrutamentu ne’e finaliza ona, maibé MEJD sei pendente ami nia kontratu no Aman Maromak deside hakotu kolega Lorico nia peregrinasaun iha mundu ida ne’e”, hakotu Halesma.

Jornalista            : Jaime Pires

Editor                    :  Mariano Martins