Husik Lia Menon Hakerek Notísia Tenke Ho Faktu

by -271 views
Tais- Embaixadór Amérika mai Timor Leste, Kevin Blackstone iha ninia vizita mai Timor Post hetan tara tais hosi Diretora Kompañia Timor Post,S.A, Suzana Cardoso, Kinta, 12/5/2021). (Foto TP/Maria Lizia)

(Reportajen Venidora Oliveira/Editor Rosa Garçia)

DILI (Timor Post) – Jornalista presiza kontinua independente iha obra jornalistiku. Bainhira hakerek notísia tenke ho faktu. Tenke hasai notísia ho onestidade. Tenke mós ho loloos. Iha dadus. No presiza públika notísia ho evidensia.

“Ha’u lee notísia, la di’ak, la tuir saida maka ha’u koalia. Dala ruma sai tiha hosi nia kontestu, iha quote (sitasaun) ne’e hakerek buat ne’ebé ha’u la koalia. Mídia ne’e la’ós Timor post.”

Informa Embaixadór Amérika mai Timor Leste, Kevin Blackstone, Kuarta (12/05/2021) wainhira halo vizita kortezia ho Timor post kuaze oras ida nia laran. Iha vizita ne’e Embaixadór husik hela lia menon ba jornalista sira atu hakerek notísia tenke ho faktu.

Nia hateten, iha mundu jornalizmu mídia sira sempre hasoru dezafiu oin-oin. Maibé presiza kontinua independente iha obra jornalistiku. No labele haksoit sai hosi objetu ne’ebé maka jornalista sira atu hakerek.

Iha konversa ho Diretora Timor Post, Suzana Cardoso, Embaxador Kevin hosik hela lia menon katak loloos iha nasaun ida, orgaun ida-idak tenke maduru hodi hatene kle’an ida-idak ninia papél. Governu hatene ninia papél. Mídia mós hatene ninia papél.

Embaixadór Kevin konta nia esperensia hodi dehan, foufoun mai partisipa iha enkontru lubuk ida. Hafoin enkontru iha jornalista sira entrevista. Maibé bainhira publika iha mídia balun iha parte sitasaun ne’e hakerek palavra ne’ebé maka nia (Embaixadór Kevin Blackstone) la koalia.

“Ha’u lee notísia la di’ak. La tuir saida maka ha’u kolia. Dala ruma sai tiha hosi nia kontestu. Iha quote (Sitasaun) ne’e hakerek buat ne’ebé ha’u la koalia. Jornalista tenke hasai notísia ho onestidade. No ho loloos. Tenke iha dadus. Presiza hasai notísia ho faktu,” tenik Embaxador Kevin hodi hatutan.

Failansu ne’e hanesan dezafiu ne’ebé Jornalista sira hasoru. Maibé nafatin iha esperansa ba futuru jornalista no editor sira sei iha esforsu atu dezenvolve aan di’ak liu tan hodi halo notísia ne’ebé akurasia.(Lee notísia kompletu iha jornal Timor Post no akompaña YouTube-timor post official)

No More Posts Available.

No more pages to load.