Dili (Timor Post)—Premiadu Nobel da Paz no Eis Prezidente Repúblika, José Manuél Ramos Horta ho Embaixadór Europeia, Andrew Jacobs, hakat ba Laklubar Munisípiu Manatutu hodi kuda ai-oan no tempu hanesan hatudu mós filme kona-ba hadomi ambiente natureza Timor-Leste nian.
Programa ne’e hanesan informasaun edukasaun ba sosiedade no povu tomak para hadomi natureza, kuda ai no keta estraga ai-laran sira.
“Prosesu ida ne’e hanesan edukasaun no kometimentu makaas hosi governu rasik maibé tane makaas hosi Uniaun Europeia,” Ramos Horta subliña iha salaun parokiál suku Barata, Postu Administrativa Laklubar, Munisípiu Manatutu, Domingu (14/12/202).
Programa meiu ambiente kuda ai hadomi natureza iha Timor-Leste, iha fatin barak. Programa balu la’o daudaun ho susesu iha fatin barak iha Timor-Leste inklui Laklubar no Bagia.
Horta haktuir, Uniaun Europeia fó apoiu maka’as ba programa ne’e tinan sanulu ona. Diresaun Wagia kuda ai kuaze rihun rua resin.
“Laklubar foin maka hahú, ha’u mai beibeik iha Laklubar ohin mai tan ho Embaixadór akompaña para hare, uluk ami sei ki’ik ami halimar iha ne’e mais primeira vés mai akompaña program kuda ai ne’e”, Ramos hanoin tuir.
Diplomata senior aprofunda kuda ai-oan la’ós di’ak ba turista de’it maibé umanidade nia moris depende ba ai-laran floresta, ai- sira atu moris depende ba bee, tesi ai- barak liu bainhira to’o tempu udan rai bele monu, ai-laiha udan ho bee sei menus, animal sira ho populasaun sira sei susar liu ba sira nia moris.
Iha fatin Hanesan Andrew Jacobs, embaixadór Europeia hatete, iha total orsamentu apoiu programa ai- ba futuru dolar amerikanu rihun 22.
Jacobs espresa Uniaun Europeia kontente finansia program iha ámbitu agro-floresta iha Timor-Leste.
“Ha’u kontente iha Laklubar, ha’u agradese ba prezensa sua exelénsia José Ramos Horta, ami iha ne’e atu hatudu ba komunidade filme tolu kona-ba ai iha Timor-Leste no papél rai, kulturál no ekonómiku” espresa Andrew Jacobs iha salaun parokiál suku Barata, Laklubar Manatutu, Domingu (14/11).
Nia subliña, ai reprezenta oportunidade ekonómiku no oportunidade kulturál no próteze rai i no mós to’os na’in. Uniaun Europeia iha Timor-Leste nia hare problema liga ba mudansa klimátika, tanba ne’e importante kuda ai atu próteze rai.
Embaixadór hatete, projetu ne’e durasaun tinan haat Uniaun Europeia ho Timor-Leste kontinua nafatin servisu iha agro-floresta, tanba kompriende katak ai reprezenta oportunidade ekonómiku no mós ai iha papél importante ba protesaun ambiente.
Iha biban ne’e Eis Prezidente Repúblika ho embaixadór UE inklui komunidade Laklubar hakat ba Raimundo Soares nia to’os, hodi vizita ai- ne’ebé maka kuda iha to’os laran. (mj4)
