Horta : Ha’u Fiar-An Manán Iha Rounde Primeiru

by -2.099 views
Kandidatu Prezidente Repúblika ho númeru sorteiu 14, Jose Ramos Horta halo konferensia imprensa, ne'ebé mak realiza iha Sede Nasionál Kandidatura, Osindu Domingu (20/03).

(Reportajen Jaime Pires/Editor Mateus da Cruz)

Dili (Timor Post)-Kandidatu Prezidente Repúblika, Jose Ramos Horta, deklara, nia parte fiar an sei manan iha ronde primeiru ne’e kedas.

“Ha’u fiar-an manán iha ronde primeiru, tanba rezultadu husi Munisípiu hotu hatudu di’ak, ho ida ne’e ha’u la hanoin atu hakat ba segundu ronde,” dehan Horta liu husi konferensia imprensa ne’ebé mak realiza iha Sede Nasionál Kandidatura, Osindu Domingu (20/03).

Premiadu Nobel da Paz ne’e hatutan, durante kampaña Xanana nia promete atu manan iha primeiru ronde, tanba ne’e primeira ronde sai ona leitura iha kampaña no mai to’o agora.

“Ha’u kontente tanba haree ba númeru votannte sa’e maka’as tebes, hodi ida ne’e ha’u fiar-an ona katak manán iha primeiru ronde,” Termina.

Iha fatin hanesan, dehan ekipa Avansadu kandidatura José Ramos Horta ne’ebé lakohi temi nia naran ba Timor Post, hatete, nia fiar katak kandidatu Prezidente Ramos Horta sei manan to’o 54% to’o 56%.

“tuir apuramentu Provizóriu ne’ebé mak fiskais husi partidu CNRT nian tama hotu mai ona hatudu katak, Horta sei manan kedas iha ronde primeiru ho pursentu 54 to’o 56,”nia dehan.

Maski nune’e, nia dehan, sira seidauk fó sai ofisiál tanba, aban Kay Rala Xanana Gusmão hamutuk ho José Ramos Horta halo konferénsia imprensa mak foin fó sai.

Enkuantu tuir dadus apuramentu Provizoriu ne’ebé hatudu katak, José Ramos Horta tur iha númeru dahuluk ho pursentu 44, hela de’it pursentu hitu atu manán mutlak ona, enkuantu Francisco Guterres Lú Olo, okupa iha segundu Lugar ho pursentu 26.

No More Posts Available.

No more pages to load.