Horta Enkontru ho Aniceto Diskute Asuntu Fraternidade Humana

by -432 views

(Reportajen Jaime Pires/Editor Mateus da Cruz)

DILI (Timor Post)- Prezidente Repúblika eleitu, Jose Ramos Horta, hala’o enkontru ho Prezidente Parlamentu Nasionál, Aniceto Guterres Lopes, hodi diskute kona-ba fraternidade Humana.

“Ha’u mak husu enkontru ho na’i Prezidente Parlamentu Nasionál, Aniceto Guterres, atu haree fila fali deklarasaun sobre fraternidade humana ne’ebé inisiativa husi sua santidade Amu Papa Francisco,” dehan Ramos Horta, hafoin enkontru remata iha Parlamentu Nasionál, Kinta (12/05).

Nia reforsa, deklarasaun fraternidade humana ne’e asembleia Jerál ONU rasik iha tinan hirak liubá halo tiha ona rezolusaun atu sai hanesan loron mundiál ida.

“Dokumentu ida ne’e Amu Papa rasik halo iha tinan 2019, iha dokumentu laran ne’e autór prinsipál mak Amu Papa ho Gran-Iman apelu ba governu sira atu adota nu’udar dokumentu nasionál para bele tama iha kurríkulu Nasionál hodi eduka sensibiliza estudante sira no sosiedade tomak” heteten Nia.

Tanba ida ne’e importante tebes atu bele hametin dame no pás iha rai sira hotu iha mundu liu-liu iha Timor-Leste kona-ba fraternidade humana.

Iha sorin seluk, Prezidente Parlamentu Nasionál, Aniceto Guterres, dehan, nia parte enkontru ho Prezidente Repúblika eleitu, Jose Ramos Horta dala rua ona ho ohin maibé diskute mak asuntu ida ne’e nafatin, kona-ba dokumentu fraternidade humana nian.

“Tanba Timor-Leste hanesan Estadu ida no povu ne’ebé mak hadomi pás no estabilidade iha mundu entaun bele promove dokumentu ida ne’e,” subliña Nia.

Nia hatutan, hodi bainhira ne’e ko’alia uluk ona entaun ohin ne’e nia mai konfirma fali, tanba atu adota dokumentu ne’e tenke adota ho rezolusaun Parlamentu Nasionál nia ida, entaun nia parte horisehik halo ona plenária estraordináriu ida no ohin sei trata dokumentu ida ne’e.(Lee notisia seluk iha Timor Post/Asesu You Tube Timor post)

No More Posts Available.

No more pages to load.