Horta Admira Kreatividade MAP

by -65 views
Eis Prezidente Repúblika José Ramos Horta foto hamutuk ho Avo Ferik ida iha Baukau. (Foto Pájina Facebook Ramos Horta)

BAUKAU (Timor Post) — Eis Prezidente Repúblika, José Manuel Ramos Horta iha nia abertura diálogu ho agrikultór suku Samalari, postu administrativu Baukau villa, admira tebes ho Ministériu Agrikultura no Peskas (MAP) nia kreatividade halo kooperasaun ho nasaun produtor Hare iha Brazil no Indonézia.

Tuir Horta, nasaun rua ne’e iha esperiénsia agrikultura ho teknologia di’ak tebes ke Timor-Leste bele adopta.

“Ha’u admira teb-tebes ho ita nia badinas, ita nia servisu, kreatividade, ha’u haree ke kontinua ho dedikasaun ho planu nune’e halo kolaborasaun di’ak ho nasaun Brazil, Indonézia tanba rai rua ne’e sira esperiénsia agrikultura ho teknolojia di’ak teb-tebes,” Horta subliña iha diálogu ne’ebé hala’o iha loron Sesta (23/07), iha Museum Rejisténsia David-Alex Osso-Luga, Baukau villa.

Nia hatutan, importante tebes ba Timor-Leste buka aumenta kooperasaun tanba rai ne’e poténsia boot ba agrikultura.

Nia afirma, rona ona informasaun husi embaixador Indonézia katak prezidente Indonézia Jokowi hakarak tulun maka’as Timor-Leste para ekonomia bele komplementa ho NTT (Nusa Tenggara Timur) nune’e husi Timor bele fa’an ba NTT no NTT mós bele fa’an mai Timor-Leste.

Premiadu Nobel da Paz ne’e esplika, dezafiu mak laiha bee iha rai seluk ou iha provínsia seluk Indonézia nian bee barak los hanesan Java, Sumatra, Bali, maibé NTT maran hanesan Timor-Leste, ne’e duni tenke aproveita udan been halo parazen para aumenta produsaun.

“Klaru apoiu maka’as husi governu sentrál, ho lideransa ministru agrikultura ke ha’u haree badinas teb-tebes, nia hatene halo polítika ho embaixador sira, ha’u haree nia ativu liu fali ministru negósiu estranjeiru,” Horta komenta.

Horta mós promete sei akompaña vizita ministru agrikultura nian iha Timor laran hodi haree no rona preokupasaun agrikultór sira nian iha terrenu, no promete bainhira sai primeiru ministru organigrama governu nian MAP sei tau ba númeru dahuluk hafoin tuir ministériu sira seluk hanesan mos nasaun balun iha mundu aplika.

“Ha’u mak Primeiru Ministru karik estrutura governu nian muda, Primeiru Ministru iha leten tuir kedas ministériu agrikultura depois saúde ho edukasaun, depois tuir ministériu sira selu-seluk,” Horta hatete. (gut)

No More Posts Available.

No more pages to load.