HNGV Komemora Loron Internasionál Enfermeira

by -145 views
Hospital Nasional Guido Valadares, Komemora Loron internasional Infermeira. Imajen TP/ Cardenio Alves

(Reportajen Cardenio Alves/Asistente Editor Hermenegildo da Costa Tilman)

Dili (Timor Post)—Hospital Nasionál Guido Valadares (HNGV), ohin, komemora loron internasionál Enfermeira nian ho atividade lubuk ida hanesan halo sertame ba Enfermajen sira iha Universidade inklui mós Institutu Superior sira iha Dili.

“Atividade ohin ne’e atu komemora loron internasionál enfermeiru nian ne’ebe organiza husi membru asosiasaun enfermeiru sira ne’ebé servisu hakmaan an iha ospitál Nasionál Guido Valadares”, dehan Sekretaria Jerál Asosiasaun Enfermeiru Timor-Leste, Jeremias da Cruz, ba jornalista sira iha HNGV Bidau, (09/5).

Nia dehan, asosiasaun hamutuk nafatin no mahon ba membru sira hotu ne’ebe servisu iha  instituisaun Governu no iha klínika privadu sira, maibé hanesan asosiasaun ida akompaña nafatin atu fó hanoin sira katak oinsá servisu ne’ebé sira fornese ne’e tenke ho kualidade atu nune’e minimiza problema sira ne’ebé durante ne’e populasaun sira kestiona iha media no mós hato’o ba ministériu Saúde kona ba oinsá servisu ne’ebé kualidade.

“Tuir dadus Ministériu saúde nian enfermeiru ne’ebé rejistu ona liu mil i tal ne’e la inklui sira ne’ebe servisu iha fasilidade privadu sira”, nia dehan.

Asosiasaun rasik halo ona ligasaun ho Ministériu Saúde no rezultadu iha ona katak iha 90 pesoas enfermeiru ne’ebe ho nivel edukasaun SPK agora sira kontinua sira nia edukasaun iha UNTL ne’ebe Ministériu Saúde mak apoiu katak sira ne’e servisu funsionáriu nafatin maibé kontinua servisu iha UNTL.

Entretantu atividade ida ne’e hetan partisipasaun husi asosiasaun enfermajen husi Universidade Nasionál Timor Lorosa’e (UNTL), Universidade Dili (UNDIL), Institutu Ciências da Saúde (ICS-Sigla Portugés) no Institutu Superior Cristal (ISC). (Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.