Hetan Projetu husi Ministériu Saúde, Ema Na’in-4 Detein Ona iha Sela KAK

by -541 views

Jornalista Jaime Pires / Noémio Falcão

DILI (Timor Post)—Komisaun Antí Korrupsaun (KAK), ezekuta mandadu buska aprensaun no detensaun ba ema na’in haat, husi Kompañia Rane Auto Motor’s LDA no 3D Life SCIENCE Timor LDA tanba la selu Taxa ba estadu.

Enkuantu suspeitu na’in haat ne’ebé mak KAK halo detensaun husi Kompañia rua ne’e kompostu husi feto rua no mane rua ho naran inisial RH, NS, AKPA no GMBC hodi halo kedas detensaun iha sela detensaun KAK Palapasu, Tersa (17/08).

Diretór Servisu Investigasaun Kriminal husi Komisaun Anti Korupsaun (KAK), Emílio Quintas hatete, ohin sira ezekuta mandadu husi tribunal nia hodi halo buska aprensaun no detensaun ba arguidu na’in haat ne’ebé mak sai na’in ba Kompañia rua ne’e.

“Kontuidu halo buska aprensaun no detensaun ba Kompañia rua ne’e tanba durante tinan sia resin hahú husi 2012 mai to’o 2021 la selu taxa ba estadu”, nia deklara ba jornalista sira iha Fatuhada, hafoin halo buska no aprensaun ba edifisiu Kompañia rua ne’e hodi foti dokomentus komprovativu sira, Tersa (17/08).

Nia subliña, “prosesu ne’ebé mak ami kaer ligasaun ho projetu ne’ebé mak ligasaun ho ita nia Ministériu Saúde nia, tanba kompañia ne’e mak sempre hatama aimoruk ba iha Dili no mós iha Oekusi, inklui suplaer material médiku ninian”, Nia aumenta.

Emílio reforsa, tanba ne’e mak ohin konsege foti dokomentu lubuk ida no leptop.

“Suspeitu na’in haat ne’e ita sei detein durante oras 72 hafoin ida ne’e mak kontinua ba prosesu primeiru interogatóriu iha Tribunal Distrital Dili,” Emílio salienta.

Atu hakotu nia dehan, ba dokomentu sira ne’ebé mak ohin ekipa KAK halo aprensaun husi Kompañia rua ne’e iha relasaun maka’as liu ba iha Ministériu Saúde, tanba Kompañia ne’e hatama ekipamentu médiku no aimoruk ba iha Hospital sira iha Dili laran inklui mós iha Oekusi.

No More Posts Available.

No more pages to load.