Hetan Estragus, Uma Kain 16 Seidauk Hetan Apoiu

by -1.364 views

(Reportájen Jaime Pires/Editor Suzana Cardoso)

DILI (Timor Post) – Hafoin dezastre inundasaun ne’ebé akontese iha loron 4 Abríl 2021 hodi estraga uma populasaun hamutuk 16 iha Bairu Ailok-Laran, Aldeia Buka Fini, Suku Bairu Pite to’o agora seidauk hetan apoiu.

“Akontesementu inundasaun foin lalais ne’e, mota tuun sobu no lori rai tama uma sira ne’e at hotu. Maibé to’o agora husi parte governu seidauk ba haree hodi fó apoiu ruma mós seidauk,” hateten Xefe Aldeia Buka Fini, João Paulo Soares bá Timor Post iha nia hela fatin, Ailok-Laran Domingu, (19/04/2021).

Uma 16 ne’e, aliende seidauk hetan apoiu hosi governu katak João, sira mós seidauk hetan apoiu hosi maluk sira ne’ebé daudaun ne’e fó hela apoiu haleu Timor laran. Maske nu’udar autridade lokal hato’o ona ba parte governu.

João haktuir, komunidade hirak ne’ebé sai nain ba uma 16 ne’e halerik hodi husu ajuda suru sai rai ne’ebé taka sira nia uma no sasan sira iha uma laran át hotu. Perkupasaun ne’e nia dadus relata ona ba iha Suku Bairru Pite, iha enkontru foin lalais ne’e. Maibé to’o agora seidauk hetan atensaun.

“Ami nafatin ezije hela. Maibé sira dehan prosesu mak la’o hanesan ne’e ona. Ne’ebé ita hotu hein deit. Maske hein mak hein, to’o agora nein iha rezultadu,” tenik João ho laran frustadu.(Lee Notisia Seluk Iha Jornál Timor Post)

No More Posts Available.

No more pages to load.