Jornalista Jaime Pires / Editór Noémio Falcão
Dili (Timor Post)—“Ha’u rona Maun Xanana tula liman ba nia maluk CNRT balun, hanesan Agio Perreira, Deonisio Babo no Adérito Hugo, sei tula liman ba sira na’in-tolu ne’e ida mak kandidatu-an ba Prezidete Repúblika,” Premiadu Nobel da Paz nu’udar mos Eis Prezidente Repúblika José Ramos-Horta.
Horta dehan, karik Kayrala Xanana Gusmão fó apoiu ba kuadru partidu CNRT mak husu atu kandidatu. Tanba ne’e, nia seidauk foti desizaun kandidata-an ka la’e.
“Ha’u seidauk rona informasaun direita husi Maun Xanana atu tula liman mai ha’u no apoiu ha’u ba nia kandudatura iha Eleisaun Prezidensiál tinan oin ne’e,” Horta ba jornalista sira Kinta (25/11/2021), iha Universidade Nasional Timor Lorosa’e (UNTL) hafoin sai oradór ba semináriu nasionál hodi komemora Loron 28 Novembru-Proklamasaun Independénsia RDTL ba-dala-46.
Tanba ne’e, Horta subliña, nia sei haree didi’ak no tetu molok foti desizaun atu kandidata-an ka la’e.
“Ha’u seidauk halo desizaun atu kandidatu-an ba Prezidete Repúblika iha eleisaun prezidensiál 2022 ne’e ka la’e, ha’u kandidatu-an ou bele mós la’e, tanba ha’u sei hanoin didi’ak lai molok foti desizaun,” Horta dehan.
