Hasai Farda, Lere Lori Fuan Sorin Ba Servi Fatin Seluk

by -1.880 views
Kandidatu Prezidente Republika, Lere Anan Timur

(Reportajen Jaime Pires/Editora Suzana Cardoso)

DILI (Timor Post) – Hafoin besik tinan 50-resin moris iha vida militar ho nia farda to’o ninia rohan iha loron Kuarta, (03/02/2022), Tenente Jeneral FALINTIL-Forsa Defeza Timor-Leste (F-FDTL) reformadu, Lere Anan Timur sei hasai farda militar hodi lori fuan sorin militat ba servi iha fatin seluk.

“Ohin loron ikus ha’u hatais ida ne’e, hamriik iha oin nu’udar Militár. Juridikamente ha’u sei hatais farda no tau ha’u nia farda fitun tolu no tuir loloos ne’e fitun haat. Mais ema hotu-hotu tuir lei no ita kumpre lei, ha’u sei entrega ha’u nia komandu ba komandu foun. ba imi nia aman no imi nia pai Jenerál Falur Rate Laek.”

Lia hirak ne’e, Eis Xefe Estadu Maior Jeneral F-FDTL Tanente Jeneral Lere Anan Timor oha ninia diskursu iha serimonia graduasaun ba membru F-FDTL foun, iha Sentru Formasaun Treinu (CFT-METINARO), Segunda (31/01).

Nia aumenta, ne’e loron ikus, la signifika katak atu abandona ka husik instituisaun ida ne’e, tanba instituisaun F-FDTL ne’e nia parte mós fó nia kontribuisaun maka’as durante tinan 70 nia vida tomak fó de’it ba ida ne’e.

“Ha’u sai maibé la’ós haluha ona instituisaun ida ne’e, Ha’u lori ha’u nia fuan sorin ba servi fatin seluk, maibé ha’u nia fuan sorin sei hela hamutuk ho imi nafatin,” Nia deklara.

Mai dehan tan, tanba ne’e agora nia reforma ona hodi tuir nia maluk funu na’in sira ne’ebé mak agora sai ona vida sivil no sai fali hanen ema pulitiku no sira seluk tan hanensan Kay Rala Xanana Gusmão no Taur Matan Ruak, inklui Francisco Guterres Lú Olo.

Tuir ajenda ne’ebé mak Timor Post asesu, aban kuarta (02/02) Tenente Jeneral F-FDTL reformadu, Lere Anan Timur, sei hatais farda fitun tolu ba loron ikus hodi partisipa iha serimonia aniversariu FALINTIL Forsa Defeza Timor-Leste (F-FDTL) ba dala-21 iha Kuartel Jeneral Fatuhada, nune’e mós entrega poder ba Vise Xefe Estadu Maior Jeneral F-FDTL, Domingos Raul ‘Falur Rate Laek’ hodi asume fali nia kargu hodi lidera fali F-FDTL, no iha serimonia ne’e mós prove kedas Falur Rate Laek ba fitun tolu. (Lee notisia seluk iha Jornál Timor Post)

No More Posts Available.

No more pages to load.