Harii iha Tinan 2019, Postu Saúde Fatumea Ameasadu hosi Rai Halai

by -133 views

Timor Post (18/01/2021)— Postu Saúde ida ne’ebé lokaliza iha Suku Nanu, Postu Administra Fatumea,Munisípiu Kovalima oras ne’e daudaun ameasadu husi rai halai. Iha fatin ne’eba sura metru la too lima mosu bee dalan sai boot ba bebeik bainhira udan tau maka’as.

“Postu saúde ida ne’ebé harii iha tinan 2019 hafoin akontese udan boot rai halai hodi fo ameasa maka’as ba postu saúde ne’e hela de’it metru rua ka tolu ida hanesan ne’e, karik udan tau maka’as tan edifísiu ne’e bele monu,” Deputadu Bankada FRETILIN, Alexandrinho Cardoso, levanta kestaun ne’e iha plenária Parlamentu Nasionál, Tersa (19/01).

Deputadu ne’e dehan, governu gasta orsamentu boot ba hodi harii edifísiu depois la uza tan nia monu oinsá, tan ne’e husu ba Ministeriu Saúde atu bele haree ba kestaun ida ne’e.

Nia hatete, kuandu ministeriu relevante la tau atensaun lalais mak postu saúde refere sei labele uza no estraga de’it osan saugate ba harii edifísiu ne’e.

Entretantu Xefe Suku Nanu, Anceltinho da Cruz, hatete, postu saúde ne’ebé hetan ameasa ne’e tanba impaktu hosi udan boot akontese foin lalais ne’e halo rai halai maka’as.

“Udan boot foin lalais ne’e halo ai halai hodi fo impaktu ba edifísiu postu saúde Nanu ameasadu atu monu, maibe ida ne’e natureza la’os ema mak estraga ou failhansu husi kompania ne’ebé halo konstruksaun ba obra refere,” Xefe Suku informa ba Timor  Post via telefone.

Xefe Suku hatete relasiona ho rai halai hodi fo ameasa ba postu saúde refere nia parte buka dalan kultura nian atu dezastre ida ne’e.

“Ha’u buka meius liu husi dalan kultura nian atu hodi haree ba ida ne’e, maibe Natureza nafatin provoka bebeik halo rai monu” xefe suku esplika.

Nia afirma, relasiona ho rai halai hodi fo ameasa ba postu saúde ne’e ona ba autoridade kompotente iha Munisipiu Kovalima atu bele halo intervensaun  maibe seidauk iha responde positivu.

“Ha’u relata ona ba serbisu saúde munisipiu atu halo prevensaun tenke halo barazeng (Bronjong) hodi tahan rai labele halai tan, maibe sei dauk iha resposta hosi diresaun relevante,” nia hakotu.

Jornalista : Julio Salinas Soares

Editór: Noémio Falcão

No More Posts Available.

No more pages to load.