Hafoin Hasoru Taur, Alkatiri: Bonitu Hein De’it Ema Sé Mak Atu Mai

husi -34 views

DILI-Sekretáriu Jerál Partidu FRETILIN, Mari Bim Amude Alkatiri, konsidera situasaun polítika atuál hanesan raan iha urat halai laloos.

Nune’e, ko’alia kona-ba orientasaun Prezidente Repúblika Francisco Guterres Lú Olo ba partidu sira iha parlamentu nasioná; atu halo movimentasaun hodi hetan solusaun, ho diplomasia Alkatiri hatete, hanesan ema bonito ida hein de’it ema sé mak atu ba hasoru.

“Ha’u hatete ona ba ita boot sira ida ne’e, katuas Bonito hein de’it ema se mak atu mai,” Alkatiri hatete ba Jornalista sira hafoin hasoru malu ho Primeiru Ministru Taur Matan Ruak iha Palásiu Governu, Segunda loro-kraik (17/02/2020).

“Ha’u hatete ona ate ema balu hamnasa, impase polítika hanesan ita-nia urat, raan ne’e la’o laloos,” Alkatiri hatutan.

Hanesan medisina sira karik halo korajen vai-pas, no ita iha korajen atu halo vai-pas ka la’e, enkuantu ita iha korajen atu halo vai-pas entaun ita halo para rezolve problema.

Hatan ba jornalista sira kona-ba objetivu saida husi sorumutu ho primeiru ministru, Alkatiri dehan, ko’alia kona-ba asuntu estadu nian.

Nia hatete, sira la ko’alia asuntu polítiku iha palasiu governu tanba uma fukun ne’e hanesan órgaun soberanu ida ne’ebé labele kahur kestaun partidu nian iha laran.

“Hasoru malu hanesan sekretáriu jerál ho prezidente partidu libertasaun popular karik ami hasoru malu iha fatin seluk,” Alkatiri dehan. (kyt)