Grupu Juventude PLP ho PUDD deklara Hamutuk ho Xanana

by -102 views

Timor Post (12/09/2020)—Grupu juventude husi Partidu Libertasaun Popular (PLP) ho PUDD deklara ba oin hamutuk ho Prezidente Partidu CNRT, Kayrala Xanana Gusmão hodi lori timor ba oin tanba sira hatene katak líder karismátiku ne’e maka bele asegura rikusoin timor nian no sei dada kadoras mai rai maran Timor Leste.

Grupu juventude kuaze nain-10 ne’e sae ba palku leten iha okajiaun Semináriu Nasionál ne’ebé organiza husi Movimentu Profisional apoiu Xanana no Partidu CNRT ne’ebé mak realiza iha Salaun Katedral, Sabádu (12/09/2020).

Juventude sira ne’e deklara, Xanana mak úniku líder ne’ebé fó nia an tomak ba luta ba libertasaun nasionál no kontinua luta ba defende rikusoin hodi konsege manan Austrália iha difinisaun fronteira marítima no sei realiza duni mehi dada kadora mai Timor Leste.

Semináriu nasionál ho tema “Maun Boot Kay Rala Xanana Gusmão ho Partidu CNRT nia ukun mak bele asegura rikusion timor nian no dada kadoras mai Timor-Leste” ne’e, partisipa másimu hosi estudante sekundáriu no universitáriu sira iha Munisípiu Dili, joventude no kuadru, militantes no simpatejantes partidu CNRT.

Observasaun Timor Pos haktuir, iha seminariu ne’e partisipa mós hosi Líder Nasionál José Ramos Horta, Jurista Avelino Coelho, José Luis Guterres, eis membru governu sira no mós atual deputadu partidu CNRT nian.

Jornalista: Jaime Pires

No More Posts Available.

No more pages to load.