GPM no PAM Entrega Prémiu Nutrisaun Tinan 2021 ba Manan Na’in-4

by -173 views
Foto Espesial

Dili (Timor Post) Gabinete Primeiru Ministru (GPM) no Programa Ai-han Mundial (PAM) servisu hamutuk entrega prémiu ba manán na’in prémiu nutrisaun tinan 2021. Objetivu husi inisiativa ne’e atu rekoñese komunidade lokál no grupu komunidade hodi sai ezemplár liu husi kometimentu hodi mellora estadu nutrisaun no redús problema malnutrisaun iha Timor-Leste.

Prémiu Nutrisaun ida ne’e hetan apoiu finanseiru hamutuk USD 100.000 Dolar Amerikanu husi Programa Ai-han Mundial (PAM) no hetan apoiu tékniku husi GPM – liu husi Sekretáriadu Movimentu Mellora Nutrisaun ka iha sigla Ingles: SUN Movement, Ministériu Saúde, Ministériu Agrikultura no Peskas, Parseiru Dezenvolvimentu Umanu, Organizasaun Mundial Saúde, no UNICEF.

“Ami agradese ba apoiu jenerozu oferese husi PAM no apoiu tékniku husi parseiru dezenvolvimentu sira – tantu nasionál no mós internasionál atu ajuda realiza Program Prémiu Nutrisaun,” hatete Primeiru Ministru Taur Matan Ruak.

Foto Espesial

“Ho orgullu ha’u hato’o parabens ba Organizasaun Sosiedade Sivíl, espesialmente lider komunitáriu, grupu juventude, grupu to’os na’in ne’ebé sai manán na’in ba Prémiu Nutrisaun tinan ida ne’e, hodi sai ezemplu di’ak liu husi sira nia prezensa iha leet,” tenik Taur.

“Nasoins Unidas, partikulármente Programa Ai-han Mundial, sente orgullu hodi hola parte iha faze importante ida ne’e. Prémiu Nutrisaun tinan ida ne’e hanorin ita konabá importánsia papél saúde, nutrisaun no dezenvolvimentu sósiu-ekonómiku iha rai laran,” hatete Adjunto Diretór PAM Timor-Leste Ash Rogers.

“Hamutuk ho Governu no parseiru dezenvolvimentu sira, PAM komprometidu atu fó apoiu solusaun inovativu husi komunidade hodi responde ba problema inseguransa ai-han no malnutrisaun iha rai laran ne’ebé feto no labarik feto sira enfrenta hela,” katak Reprezentante PAM interinu Rogers.

Foto Espesial

Tarjetu ba aplikasaun Prémiu Nutrisaun Primeiru Ministru tinan ida ne’e, hamutuk kategoria 4 (hat) mak hanesan Lider Komunitáriu, Grupu Feto, Grupu Juventude, no Grupu To’os Na’in. Grupu komunidade iha suku sira iha Timor laran tomak hetan konvite atu kompete ba prémiu ida ne’e. Manan na’in sira hetan selesaun bazeia ba kritéria konabá: esforsu no halo kreatividade hodi prioritiza problema malnutrisaun no inseguransa ai-han; hato’o solusaun ho sira nia kreatividade rasik liu husi uza rekursu lokál; kapasidade hodi mobiliza apoiu eksternal.

Programa Prémiu Nutrisaun ne’e ofisiálmente lansa husi Primeiru Ministru iha Augusto 09, 2021. Manan na’in sira sei simu sertifikadu no montante osan hamutuk USD 100.000 hodi investe iha setór nutrisaun iha sira nia suku no komunidade rasik.  (cao)

No More Posts Available.

No more pages to load.