Governu Viola Direitu Vítima Inundasaun

by -462 views
Ilustrasaun

DILI (Timor Post)—Relasiona ho vítima Afetadu ba inundasaun ne’ebé sei kontinua hela iha lona okos, parte Sosiedade Sivíl, hosi Organizasaun Asosiasaun HAK, konsidera governu halo violasaun ba vítima inundasaun sira nia direitu.

HAK konsidera viola direitu humanus tanba, tuir HAK nia observasaun iha terrenu hetan informasaun hosi komunidade sira katak governu liu hosi SEPS durante ne’e tun ba halo identifikasaun maibé to’o agora laiha komunikasaun.

“Parte protesaun sivíl halo ona identifikasaun ba uma kain afetadu sira, maibé tuir loloos identifikasaun sira ne’e tenke iha karakter ida urjente. La’ós de’it foti naran depois lakon komunikasaun, se hanesan ne’e mak ita konsidera violasaun direitu signifika Abuzu ida, “dehan Diretór HAK, Sisto dos Santos ba Timor Post, Kinta (30/09).

Nia sujere katak, tuir loloos parte SEPS tenke halo monitorizasaun, labele utiliza sasán apoiu sira uza ba nesesidade governu nian.

Tanba ne’e, parte HAK rekomenda ba KAK no órgaun kompeténsia sira hanesan Parlamentu Nasionál, atu halo investigasaun tanba povu hakarak moris iha dignu nia laran.

“Ita hetan apoiu solidariedade hosi rai ka nasaun barak, tantu osan no mós sasán bázika, sasán sira nee ba iha ne’ebá, nee kompeténsia KAK ho Parlamentu tenke buka tuir investiga labele nonook, hodi komete hotu abuzu ne’e la di’ak,” dehan Sisto.

HAK mós husu ba Governu atu labele halo promete oi-oin ba povu, tenke fó informasaun klaru ba komunidade liu hosi lider komunitaria, nune’e labele husik povu hela iha mukit nia laran.

Ikus liga ba asuntu ne’e, Timor Post koko Konfirma ba parte relevante sira hanesan KAK, maibé parte ne’e laiha biban atu halo entrevista tanba okupadu ho servisu koletivu balu. (jxy)

No More Posts Available.

No more pages to load.