Governu Timor-Leste Apoiu Osan Rihun $120 ba Sahara Osidentál

by -14 views

DILI—Governu Timor-Leste liuhosi Ministériu Negósiu Estranjeiru no Kooperasaun (MNEK) apoiu orsamentu ho montante rihun $120 ba Sahara Osidentál nu’udar apoiu solidariedade ba sira nia luta ba ukun rasik-an.

Ministru Prezidénsia Konsellu Ministru Fidelis Manuel Leite Magalhães, haktuir, konsellu ministru aprova proposta ne’e aprezenta hosi MNEK.

“Timor-Leste apoiu hanesan solidariedade ba sira nia kauza ukun rasik-an,” Fidelis subliña ba Jornalista sira hafoin reuniaun Konsellu Ministru iha Palásiu Governu, Dili, Kuarta (10/2/2021).

Governante ne’e dehan, hotu-hotu hatene katak Sahara Osidentál iha reprezentasaun iha Timor-Leste, tanba sira ninia luta ukun rasik-an modelu hanesan Timor nian.

Pais rua ne’e hahú luta ba ukun rasik-an hahú ho tempu ne’ebé hanesan, ezemplu hanesan iha Timor-Leste altura ne’ebá Portugés sai, Indonézia tama fali.

Tanba ne’e, nia konta, iha Sahara Osidentál bainhira Españól sai Maroko maka tama fali.

Nune’e, Fidelis sublina, prosesu luta ne’e hanesa esforsu ida, para Sahara Osidentál bele iha solusaun ne’ebé maka atu lori sira ba ukun rasik-an.

Jornalista José Kaet

Editór Noémio Falcão