Governu Tenta Evakua Timoroan Na’in-20 iha Xina tanba Atake Virus Corona

by -73 views

DILI—Governu Timor-Leste liuhusi Ministéru Ensinu Superiór Siénsia no Kultura (MESSK) hala’o ona koordenasaun ho Ministériu Negósiu Estranjeiru no Kooperasaun (MNEK) hodi evakua timoroan na’in-20 ne’ebé hela iha Provínsia Wuhan, Xina, tanba atake virus ho hanaran Corona iha sidade ne’e no hamate ona ema atus resin.

Virus foun Corona (Coronavírus) iha Xina hahú espalla iha sidade Wuhan. Virus ne’e daet tiha ona iha Beijing,Shanghai no espalla ona ba nasaun seluk iha Europa no nasaun sira iha Ázia. Moras ne’e da’et husi animal fuik hanesan Niki, Samea on seluk tan.

Timoroan na’in-20 ne’ebé oras ne’e dadauk iha hela Provínsia Wuhan, Xina, nu’udar estudante bolseiru ne’ebé ba hala’o estudu hahú iha tinan 2018.

Ministru MESSK, Longuinhos dos Santos ba Jornalista sira iha nia servisu fatin, Kolmera, Dili, hatete, nia parte halo ona kontaktu ho bolseiru timoroan na’in-20 iha Provinsia Wuhan hodi fó nafatin korajen ba sira atu labele pániku to’o Governu foti desizaun ruma ba sira.

“Ha’u sei enkontru ho MNEK no Ministru Estadu atu haree mekanizmu, liu-liu análiza se atu halo evakuasaun ba ita-nia bolseiru sira atu tau iha ne’ebé. Sira fila mai iha Timor-Leste ka mantein iha Xina,” Ministru Longuinhos hatete.

Tuir nia, estudante sira iha Wuhan ne’e bele evakua de’it ba iha Xanghai maibé mekanizmu ne’e oinsá presiza halo kooperasaun ho Xina atu bele halo atendementu emerjénsia.

“Kondisaun ne’ebé estudante sira iha Provinsia Wuhan la’ós enfrenta de’it ba virus Corona, menus ba hahan,” Ministru Longuinhos haktuir. (cao)

No More Posts Available.

No more pages to load.