Governu Tenke Autoriza Transporte Públiku Hala’o Atividade

by -18 views
Foto TP/ Espesial

DILI (Timor Post) —Situasaun pandemia Covid-19 ne’ebé obrigadu estadu aplika estadu emerjénsia, serka sanitaria inklui konfinamentu obrigatóriu, perturba movimentu transporte públiku, liu-liu husi munisípiu sira mai Dili, ida ne’e hamete rendimentu ekonomia família nian.

Tanba ne’e, emprezariu Timoroan, Fernando da Silva, husu ba governu atu loke hikas dalan ba transporte públiku husi munisípiu sira, nune’e sira mós bele hetan netik osan hodii sustenta nesesidade uma laran.

“Pelumenus loke oportunidade ba setór privadu bele halo atividade, hanesan agora daudaun transporte labele la’o, tanba transporte terrestre, hanesan bus ho mikrolete involve ema rihun, se sira ne’e mak la servisu sei afeta ba nesesidade uma laran,” Fernando ba Timor Post, iha Aeroportu Nicolau Lobato Komoro, Tersa (20/07).

Aleinde ne’e, husu mós ba governu atu kapasita Banku Nasionál Komersiu Timor Leste (BNCTL) fó fundu ne’ebé natoon hodi fó kreditu ba setór produtivu sira.

“Ami husu governu tau osan ba BCNTL hodi fó deve ba setór privadu nasionál sira para bele hala’o atividade sira ne’ebé produtivu sira, nune’e diversifika ekonomia,” nia rekomenda.

Tuir nia, governu tenke investe maka’as ba setór agrikultura, no daudaun ne’e mós rekursu umanu ba setór agrikultura aumenta ba beibeik. Koloka sira iha suku sira atu nune’e bele hasa’e produsaun rai laran.

Nia dehan, kuandu setór agrikultura mak avansa ona, Timor-Leste bele redus ona produtu importasaun sira husi nasaun seluk.

“Por ezemplu kuda modo, tomate, buat sira ne’e para apoiu ita nia nesesidade tenke urjente para atu halo, nune’e produtu husi li’ur hanesan modo, tomate, ai manas buat sira ne’e la presiza mai husi liur,” nia katak.(jho)

No More Posts Available.

No more pages to load.