Governu Suspende Konfinamentu Obrigatóriu iha Dili no La Estende Baukau-Vikeke, Transporte Públiku Bele Sirkula Ona

by -1.088 views

Timor Post (08/04/2021)—Governu liuhusi Konsellu Ministru (KM) foti ona desizaun suspende konfinamentu obrigatóriu iha Munisípiu Dili no la estende tan medida ne’e iha Munisípiu Baukau no Vikeke tanba kalamidade públiku relasiona ho udan no anin boot rejulta inundasaun iha territóriu liuliu iha kapital nasaun.

Nune’e, governu deside estadu situasaun kalamidade nivel nasional durante loron 30. Desizaun ne’e foti hodi hasoru akontesimentu inundasaun iha territóriu liuliu iha Dili.

Ho desizaun ne’e fó livre ba komunidade tomak bele hala’o movimentu no hala’o atividade negósiu sira maibé atividade relijiaun, eskola, serimónia familiar, desportu no atividade saida de’it maka halibur ema barak kontinua bandu.

Katak Ministru Prezidénsia Konsellu Ministru Fidelis Leite Magalhães subliña, maske konfinamentu obrigatóriu suspende ona iha Dili no la estende iha Baukau no Vikeke maibé serka sanitária  iha munisípiu Dili kontinua to’o dia 15 oin mai no ba Baukau no Vikeke aplika loron hitu tan hahú husi desizaun KM nian fó sai. Katak, ba sé de’it maka halo movimentasaun sai husi munisípiu tolu ne’e kontinua halo teste swab hatudu rejultadu negativu maka bele halo viajen.

“Konsellu Ministru halo reuniaun, rona impaktu hosi inundasaun  ne’ebé mak akontese iha loron 4 liu ba, tanba ne’e Konsellu Ministru deside atu suspende impozisaun konfinamentu domisiliáriu jeral ba populasaun iha munsípiu Dili. Ba Baukau no Vikeke sei la estende tan tanba prazu iha loron aban (09/04/2021),”  Fidelis subliña iha konferénsia ba imprensa hafoin reuniaun KM to’o tuku 9 kalan.

Nia hatutan, desizaun KM nian ne’e to’o desizaun tuir mai.

Tanba ne’e governu autoriza ona trasporte públiku sira hanesan Bemo no Taxi sira bele la’o fali ona, loja sira hotu bele loke fali ona no atividade negósiu hanesan fa’an ropa sira mós bele la’o fali ona.

Inundasaun iha dia 04/04/2021, Fidelis dehan, tuir estimasaun, Timor Leste lakon liu millaun dolar Amerikanu atus ida. Inklui fasilidade públiku no privadu la sura ema mate hamutuk 42.

Jornalista Jaime Pires

Editór Noémio Falcão

No More Posts Available.

No more pages to load.