Governu Sei  Transforma Atauru Ba Munisípiu Espesiál

by -750 views

Timor Post (09/02/2021)- Ministru Administrasaun Estatál (MAE), Miguel Pereira de Carvalho, informa b Primeiru Ministru (PM), Taur Matan Ruak, tersa (09/02) atu transforma postu administrativu Atauru Munisípiu Dili sai munisípiu ketak ida.

“Ohin ko’alia ho Primeiru Ministru kona-ba preparativu sira atu bele garante katak, Atauru iha infraestrutura ida ne’ebé mak natoon, atu estadu konsege transforma postu administrativu Atauru ba iha Munisípiu espesiál ida, tanba ne’e Primeiru Ministru hahú rona ona asuntu ne’e”, dehan Ministru Administrasaun Estatál, Miguel Carvalho ba Jornalista sira iha, Palasiu Governu, tersa (09/02).

Ministru adianta ministériu administrasaun estatál aprezenta ona iha konsellu ministru semana tolu ka haat ba kotuk. “Konsellu ministru apresia proposta ida ne’e, no iha nesesidade hodi harii munisípiu ida iha Atauru, maibé presiza iha proposta aliterasaun ida hosi governu ba to’o iha Parlamentu Nasionál no ba Prezidente Repúblika promulga mak foin sai munisípiu”, subliña Ministru.

Ba kritériu Ministru aprofunda, prevee iha Konstituisaun Repúblika Demokrátika Timor-Leste katak, tenke iha tratamentu administrativu espesiál ba fatin rua, ida mak Oekusi no mós ida mak Atauru.

“Hanesan ministériu ne’ebé mak kompeténsia ba ida ne’e sei propoin ba entidade kompetente sira liu-liu ba konsellu ministru no Parlamentu Nasionál, kona-ba nia estatutu espesiál sira ne’e, maibé ida ne’e sei hatur iha proposta ida ne’ebé mak ami sei lori mai”, Miguel deklara.

Atu hakotu nia rekoñese kestaun transforma Atauru sai munisípiu espesiál ne’e opsaun polítika lejislativa, ne’ebé kuandu hatuur ona iha dokumentu legal mak sei hare detalla.

Jornalista            : Jaime Pires

Editor                    : Mariano Martins

No More Posts Available.

No more pages to load.