Governu Sei Muda Pasiente Covid-19 ba HNGV

husi -467 views

(Reportájen José Caet)

DILI (Timor Post) – Governu liuhosi Ministériu Saúde iha planu atu muda pasiente Covid-19, ne’ebé baixa iha sala izolamentu Vera Cruz ba Hospital Nasionál Guido Valadares (HNGV), tanba rekupera tiha ona hosi moras ne’e.

Ministra saúde, Odete Maria Freitas Belo, hato’o kestaun ne’e, hodi hatán ba preokupasaun hosi profisionál saúde balun ne’ebé lamenta tebes ho desizaun Ministériu Saúde nian. Tanba ne’e bele fó risku ba pasiente sira ne’ebé mak halo tratamentu saúde iha HNGV.

Nia dehan, maski sira nia rezultadu Polymerase Chain Reaction (PCR) negativu tiha ona, maibé presiza nafatin fó tratamentu ba sira, tanba sira sofre hela moras seluk hanesan, paru-paru basa ne’ebé mak utiliza hela oksijéniu.

“Hospital Nasionál Guido Valadares prepara hela fatin, tanba pasiente sira ne’ebé mak ita halo tratamentu iha Vera Cruz, daudaun ne’e sira nia teste PCR rezultadu negativu. Sé negativu ona más ninia paru-paru, tanba estraga hela no nia sei dependente hela ba oksijéniu. Entaun ita bele muda ba Hospital Nasionál Guido Valadares”, informa Odete hafoin remata enkontru ho Primeiru Ministru iha rezidénsia Faról, Tersa (04/05).

Tanba ne’e, ministra saúde garantia katak, bainhira muda pasiente sira ba, sei laiha impaktu ba pasiente sira seluk ne’ebé baixa iha HNGV.

“Muda ba HNGV la fó impaktu, tanba virus negativu ona no virus mai hosi ne’ebé, virus laiha ona ita trata nia hanesan pasiente baibain”, nia esplika.

Governante ne’e husu atu halakon ta’uk, hodi ba halo tratamentu, tanba moras sira ne’e hanesan de’it, maibé prosesu tratamentu mak la hanesan.

“Ema balun ne’ebé moras hada’et makaas hanesan Covid-19. ita trata oin seluk,” Ministra saúde hakotu.(Lee Notísia Seluk Iha Jornál Timor Post)