Governu Presiza Estabelese Tan Tribunál iha Munisípiu 3

husi -9 views

Reportajen Cesaltina Ximenes/ editor Mateus da Cruz

 

DILI(Timor Post) Estadu Timor-Leste presiza estabelese tan tribunál Distritál iha Munisípiu Tolu hanesan Maliana, Vikeke no Manufahi hodi nune’e bele redús númeru kazu pendente ne’ebé agora daudaun sa’e maka’as iha Tribunál.

 

Jurista Rui Amaral Martins, nu’udar Dosente Direitu iha UNPAZ, ba jornalista sira iha nia fatin, Kuarta (16/06), hatete, la natoon atu halo redusaun ba prosesu kazu sira ho lais, kuandu Timor-Leste sei hamriik nafatin ho tribunal distritál 4 iha Dili, Suai, Baukau no Oekusi.

 

“Ita ko’alia kona-ba prosesu kazu, ne’e barak liu pendente iha tribunal. Ida nee hatudu katak ita nia rekursu umanu sei menus, tanba ne’e husu ba governu no estadu ida nee tenke tau ona hanoin oinsá atu estabelese tan tribunal distritál hanesan iha Manufahi, Vikeke no Maliana,” nia dehan.

 

Rui hatete, bainhira estadu estabelese tan tribunál 3 iha munisípiu hirak ne’e maka mak estadu rasik bele fasilita ona nia povu kbiit laek sira hodi asesu ba justisa ho fasil.

 

“Kuandu hanesan nee, ita nia povu sira hela iha area rural la presiza gasta osan atu la’o dook, no ita fasilita ona liu hosi lori justisa hakbesik ba sira atu asesu di’ak liu,” subliña.

 

Entretantu, kona-ba kestaun ne’e Juis administradór Tribunal Distritál Dili (TDD), Afonso Carmona, dehan, nia parte konkorda ho hanoin ne’e maibé konsellu mak sei foti desizaun.

 

“Hanoin sira nee di’ak, maibé ida nee ami nia konsellu mak sei deside,” hatete Juis Carmona.

 

Maibé nia mós dehan, bele estabelese tan tribunál más presiza haree mós ba kapasidade orsamentu ne’ebé iha.

 

“Ami ho tribunal haat ne’e mós sei sufisiente, no sei atende prosesu di’ak no lais, tanba ita haree mós ba orsamentu,” dehan tan nia. (Lee notisia kompletu iha Jornal Timor Post)