Governu Prepara Selebrasaun Loron Proklamasaun Independénsia iha Triloka

by -345 views
Estátua Proklamador Independénsia RDTL, Francisco Xavier do Amaral. Foto Espesial

Jornalista Jaime Pires / Editór Noémio Falcão

DILI (Timor Post)—Governu liuhusi Ministériu Administrasun Estatal (MAE), servisu hamutuk ho autoridade lokal hahú halo preparasaun ba selebrasaun loron Proklamasaun Independénsia RDTL ba-dala 46 iha Triloka-Munisípiu Baukau.

Ministru Miguel de Carvalho ba Jornalista sira hafoin partisipa iha reuniaun Konsellu Ministru (KM), iha Palásiu Governu, Kuarta (27/10/2021) hatete, iha selebrasaun ne’e sei realiza mós atividade sira seluk hanesan desportu eskolar no loke feira hahú loron 22 to’o 28 Novembru.

“Ita mós sei realiza atividade sira ba inagurasaun ba projetu sira ne’ebé mak tinan ida ne’e implementa husi varius ministériu,” Governante ne’e hatete.

Orsamentu ba serimonia selebrasaun 28 de Novembru tinan ida ne’e, husi Orsamentu Jerál Estadu (OJE) 2021 nian, rihun $400.

Miguel aumenta, selebrasaun tinan ida ne’e, sei partisipa de’it husi membru Governu, Prezidente Repúblika, Prezidente Parlamentu ho Deputadu, Veteranus sira hotu no Eis Titilar.

No More Posts Available.

No more pages to load.