Governu Organiza Ritual ba Harii Sidade Universitáriu iha Aileu, Lia-Nain Siik Dezafiu iha Prosesu Konstrusaun

by -900 views
Serimónia Ritual ba sidade Universitariu Aileu. Iha imajen ne'e Ministru Ensinu Superior Siénsia no Kultura, Longuinhos dos Santos ho dirijente hamutuk ho Lia na'in sira. Foto TP/ José Mauno.

Jornalista José Mauno / Editór Noémio Falcão

Aileu (Timor Post)—Governu liuhusi Ministériu Ensinu Superior Siénsia no Kultura (MESSK), Segunda (20/12/2021) halibur Lia-Nain sira halo ritual nu’udar faze dahuluk ba hala’o lansamentu fatuk dahuluk ba sidade universitáriu iha Munisípiu Aileu.

Iha serimónia ritual ne’e lia-nain sira ko’a animal hatudu sinál ladun di’ak iha talin no aten, maibé lia-nain sira fó signifikadu katak sinal ne’e hatudu momos iha duni komunidade balun ne’ebé hela iha área ne’eba ladun koopera.

Ministru Longuinhos Dos Santos haktuir, husi rejultadu ritual ne’e nia parte kontinua halo aprosimasaun ho komunidade sira hotu atu oinsá governu nafatin hala’o dezenvolvimentu iha nasaun.

Rai ne’ebé maka atu halo konstrusaun ba sidade universitáriu iha Aileu éktare 24. Komunidade afetadu hamutuk 108 kompostu husi uma ka’in-79 konkorda no pagamentu hotu ona, uma ka’in 29 mak la konkorda seidauk halo pagamentu indiminizasaun.

Governu iha komitementu atu hala’o dezenvolvimentu ba timoroan hotu-hotu tuir programa governu daualu nian tenke aselera ba oin.

“Mezmu iha ita nia kultura hatudu buat balu ladún di’ak maibé la signifika katak ladi’ak para labele harii sidade Universitariu Aileu la’e, maibé hatudu  balun mak la kopera hamutuk ho governu,” Ministru Longuinhos hatete.

“Komunidade uma ka’in 29 maka la konkorda atu bele halo indiminizasaun maibé ita iha mekanizmu ida asegura nafatin sirs nia direitu ikus liu maka prosesu liu husi justisa,” nia hateten.

Lia na’in husi lisan Raimansu, José da Costa hatete, naan urat ne’ebé maka haree husi manu no fahi katak buat hotu la’o loos maibé iha sikun uitoan hatudu katak lian seidauk hanesan tanba balu konkorda balu la konkorda. Maske nune’e, José subliña, ba oin sei la’o di’ak.

“Ami hanesan Lia na’in kontente tebe-tebes tanba aban bainrua oan sira sei la la’o dook ba munisípiu seluk maibé uza oportunidade iha Aileu,” nia kontente.

No More Posts Available.

No more pages to load.