Governu La Sériu Dezenvolve Turizmu Kounitária no Relijiozu

by -353 views

DILI (Timor Post)—Koordenadór Organizasaun La’o Hamutuk (LH), Celestino Gusmão observa katak governu seidauk fo atensaun maximu ba dezenvolvementu turizmu iha rai laran durante ne’e.

Tanba ne’e, nia sujere, ba governu atu tau atensaun sériu ba dezenvolvimentu setor turizmu rai laran (dometika).

“Durante ne’e, turizmu komúnitariu, relijiozu, governu seidauk tau matan, seidauk fó atensaun máximu. Ba futuru presiza governu tau atensaun sériu kona ba ida ne’e,” Celestino Gusmão ba Timor Post, Kuarta (29/09).

Nia kestiona, tanba durante ne’e governu foka liu ba alokasaun orsamentál atinji ona pursentu hira?, maibé presiza iha peritu ne’ebé mak bele halo estudu dezeña no planeamentu planu mestre turizmu, nune’e mós halo estudu viabilidade iha aspetu finansial, sosiál no ekonómiku.

“Ita bele kaer modalidade ida para asegura investimentu hotu ho esforsu hotu, la tuir ita nia gosta, ita nia hakarak, mais avansa bazea nesesidade,” nia dehan.

“Fatin turizmu hanesan iha Kristu Rei, no fatin balun komesa aat ona, tanba la mai hosi projetu espesífiku, laiha estudu integradu ida, laiha estudu viabilidade ba aspetu ekonómiku, kulturál no ambiente, buat sira ne’e la mai husi estudu iha ne’ebá,” hatutan nia.

Nia informa, turizmu iha parte barak; turizmu modernu, turizmu komunitaria, turizmu históriku, alende ne’e ba turizmu relijiozu. Ida ne’e mak ba oin, governu presiza tau atensaun máximu, maibe nia la konkorda kuandu emprezáriu sira balun dehan sabraut.

Celestino rekoñese mós, katak iha duni difikuldade maibé labele dehan sabraut, iha prioridade barak ne’ebé maka iha governu iha hela konsentrasaun.

“Ita presiza iha prevensaun ba Covid-19, maibé ita nia rain ne’e presiza duni dezenvolve turizmu komúnitariu,” nia hateten.

Aleinde ne’e, nia hatutan, atu dezenvolve turizmu iha rai laran, labele ko’alia lai ba orsamentu, maibé haree ba nesesidade, iha ka la’e?, kondisaun iha ka la’e?, oinsá atu avansa turizmu sira ne’e, atu avansa ho modalidade ida oinsá?, iha ona analiza ba buat sira ne’e depois mak bele a loka orsamentu ba.

“Haree planu no estudu sira ne’e la’o hotu ona, mak bele aloka orsamentu, nune’e bele avansa ba oin. Labele haree ba orsamentu, depois osan hotu tiha servisu la la’o ba oin,” nia remata. (61L)

No More Posts Available.

No more pages to load.