Governu Kria Kompensasaun Eventualidade Mate Rezulta Husi Vasina

by -58 views
Fidelis Leite Magalhães

Jornalista Jeremias Soares / Editór Noémio Falcão

DILI (Timor Post)—Konsellu Ministru aprova ona projetu dekretu lei kona-ba kriasaun kompensasaun ba eventualidade mate ka inkapasidade rezulta husi inokulasaun ho vasina kontra COVID-19. Proposta ne’e aprezenta husi Ministru Finansas, Rui Augusto Gomes.

Maske risku efeitu sekundáriu grave ne’ebé provoka husi vasina kontra COVID-19 ki’ik tebes, ne’ebé kompensa barak tanba benefísiu husi vasinasaun ba populasaun ein-jerál, inisiativa lejislativa ne’e ho objetivu atu prevene situasaun ne’ebé ninia efeitu sekundáriu grave liu no atu prevee devida kompensasaun ba ema ne’ebé esperimente efeitu sekundáriu hirak ne’e.

Dekretu-Lei define katak iha kazu inkapasidade inferiór 30% provoka husi vasina kontra COVID-19 sei fó kompensasaun ida ho valór dolar amerikanu rihun ida, karik inkapasidade iha entre 30% no 70% sei atribui valór dolar amerikanu 2100 no iha kazu vasina provoka inkapasidade boot liu 70% sei atribui dolar amerikanu rihun 7. Iha kazu eventualidade mate rezulta husi inokulasaun vasina nian sei atribui kompensasaun ida ho valór dolar amerikanu rihun sanulu.

“Ida ne’e la’ós ita halo naran-naran de’it, atribuisaun ne’e tenke sujeita ba verifikasaun saúde nian se komprova dehan mate ne’e tanba vasina. Entaun ida ne’e hanesan seguru ida, ne’ebé mak Governu oferese, tanba iha parte Governu nian, fiar duni katak, vasina ne’e la-iha risku, maibé se balu sei preokupa nafatin ho risku, entaun Governu avansa ho mekanizmu seguru ida ne’e”. Ministru Prezidénsia Konsellu Ministru, Fidelis Leite Magalhães, informa ba jornalista sira hafoin remata reuniaun KM, iha Palasiu Governu, kuarta  (23/06).

Fidelis dehan, Governu nafatin iha konviksaun, katak bazeia ba evidénsia sira hotu, risku ne’ebé husi vasina sei menus liu, kompara ho la vasina iha kontestu atuál Timor-Leste nian, bainhira akontese tranzmisaun komunitaria.

“Iha Timor-leste, neste momentu ita la’ós iha vasina ida de’it, ita iha vasina rua, hanesan AstraZeneca no Sinovac, ne’ebé opsaun ne’e fila-fali ba sidadaun sira nia liman, atu hetan vasina ida ne’ebé mak sira sente di’ak liu”. Fidelis adianta. (Asesu informasaun seluk iha Jornál Timor Post)