Governu Kontinua husu PR Renova EE ba-dala 10  

husi -87 views

Timor Post (20/01/2021)- Oitavu governu, liu hosi reuniaun Konsellu Ministru iha Palasiu Governu, kuarta (20/01), delibera propoin ba Prezidente Repúblika, Francisco Guterres Lu-Olo, renova Estadu Emerjénsia (EE) ba loron 30 tan.

Ministru Prezidensiál Konsellu Ministru, Fidelis Leite Magalhães ba Jornalista sira hatete, Governu propoin ne’e hare ba mudansa preokupante hosi situasaun epidemiolojika no proliferasaun ba kazu rejistadu sira hosi kontájiu Covid-19 nian iha nivel rejionál, no mós iha nivel mundiál, atu evita no neutraliza risku sira hosi propagasaun SARS-CoV-2.

“Governu delibera atu propoin ba Prezidente Repúblika, Francisco Guterres Lu-Olo, hodi renova estadu emerjénsia ba loron 30 tan, atu nune’e bele proteje saúde públika no iha kbiit atu hatán ba sistema nasionál saúde nian”, dehan Fidelis.

Ministru subliña ho renovasaun estadu emerjénsia, permite atu suspende ka klima direitu kona-ba sirkulasaun internasionál, hosi sirkulasaun no fiksasaun rezidénsia no rezisténsia nian.

Iha biban ne’e Konsellu Ministru mós aprova aliterasaun ba Proposta Lei kona-ba Enkuadramentu Orsamentu Jerál Estadu no Jestaun Finanseira Públika nian, ne’ebé aprova ona iha soru mutuk loron 21 fulan-Dezembru tinan 2020 nian, tuir projetu ne’ebé aprezenta husi Ministru Finansas, Rui Augusto Gomes.

Konsellu Ministru analiza projetu Proposta Lei aliterasaun dahuluk ba Lei n.7/2009, loron 15 fulan-Jullu, ne’ebé kria Komisaun Funsaun Públika (KFP), ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães.(Jornalista: Jaime Pires,/*)