Governu Japaun Tulun Ambulansia 38

by -370 views
Hotline- Embaxada Japaun intrega ambulansia unidade 38 ho ekipamentu Covid-19 ba TL. (Foto TP/Olga Soares)

(Reportájen Olga Soares/Editor Suzana Cardoso)

DILI (Timor Post) – Atu fasilita servisu Ministériu Saúde (MS) nian ho efetivu liután, Governu Japaun liu husi embaixada Japaun iha Timor-Leste (TL) fó tulun ambulansia hamutuk 38 hodi koloka ba munisipiu hirak ne’ebé presiza.

“Ita iha ambulansia 38. Husi unidade hirak ne’e, unidade 12 mak ita simu uluk ona. No unidade 10 ita sei prosesu hela iha Alfándega. Ambulansia hirak ne’e ita sei fó ba sentru saúde iha munisípiu sira. Maibé ida ne’ebé mak presiza.”

Esplika Ministra Saúde (MS), Odete Maria Freitas Belo ba Jornalista hafoin remata serimonia simu no intrega ambulansia hirak ne’e husi Embaixadór Japaun TL, KINEFUCHI Masami, iha Caicoli, Kuarta, (12/05/2021).

Desde Covid-19 hahu iha tinan 2020 haktuir MS Odete, ambulansia unidade balun fó tiha ona husi Banku Mundiál. Ba tinan ida ne’e simu tán ambulansia unidade 38, apoiu husi Governu Japaun liu husi Embaixada Japaun iha TL.

Esplika MS Odete, ambulansia hirak ne’e sei prioridade ba tula pasiente. Maibé la taka dalan  bainhira atribui ba iha munisípiu sira mak sei organiza, karik sira iha ambulansia sufisiente tula moras baibain. No bele halo jestaun rasik para bele uza ambulansia hodi tau matan ba pasiente ne’ebé ho diagnostika Covid-19.

“Ita nia ambulansia sufisiente. Bainhra ita halo jestaun ho di’ak, bele rezolve problema. Maibé, ita la’ós ambulansia de’it maka resolve problema pasiente nian. Maibé rekursu umanus liliu médiku sira iha referral atu halo atendimentu iha munisípiu sira sei iha problema,” tenik MS Odete.

Lia fuan hanesan hato’o husi Embaixadór Japaun, KINEFUCHI Masami. Iha ninia deskursu nia hateten, TL hasoru dadaun difikuldades boot, kauza husi pandemia global Covid -19 no estragus sira husi inundasaun foin lalais ne’e.

“Kona ba luta hasoru Covid-19, ba dala uluk ha’u hakarak louva esforsu hirak ne’ebe mak Governu no Povu TL halo ona hodi kontra surtu feroz ida ne’e. Agora dadaun tempu ba ita hotu hodi pasensia no kontinua ita nia esforsu hotu hodi luta hasoru virus ida ne’e,” hateten Embaixadór KINEFUCHI hodi hatutan.

Tanba hare fila-fali ba istória nasaun nian, ita luta hodi restaura independensia. Timoroan sira hotu hatudu ona resistensia no solidaridade iha tempu naruk. Nune’e, Embaixadór KINEFUCHI fiar katak Timoroan sira bele hasoru difikuldade saida deit mak infrenta.(Lee notísia seluk iha Jornál Timor Post)

Entrega – Governu Japaun liu husi Embaxadór Japaun iha Timor Leste, KINEFUCHI Masami entrega ambulansia no ekipamentu médiku ba Governu Timor Leste iha edifisiu Ministériu Saúde, Kuarta, (12/05/2021). (Foto TP/Maria Lizia)

No More Posts Available.

No more pages to load.