Governu Japaun Oferese Asistensia Ho Valor Juta U$16-resin

husi -163 views
Embaixadór Japaun ba TL, Kinefuchi Masami kaer liman Covid-19 nian ho Ministra Saúde (MS), Odete Maria Freitas Belo. (Foto TP/Maria Lizia)

(Reportájen Olga Soares/Editor Suzana Cardoso)

DILI (Timor Post) – Atu suporta Timor-Leste (TL) nia luta hasoru Covid-19 maka Governu Japaun liu hosi Embaixada Japaun iha TL dezde inisiu deside ona hodi fó apoiu ho valor osan Juta U$16-resin.

Haktuir Embaixadór Japaun TL, Kinefuchi Masami iha ninia deskursu foin lalais ne’e iha Ministeriu Saúde. Nia hateten, dezde tinan 2020 iha inisiu Covid-19 mosu iha TL, Governu Japaun deside ona hodi fó apoiu.

Katak Embaxadór Kinefuchi, Governu Japaun ninia apoiu ne’e liu hosi fó oferese programa asistensia oioin. No projeitu hirak ne’e hodi suporta Timor oan sira nia luta hasoru Covid-19 ne’ebé loron ba loron aumenta ba beibiek.

“Dezde tinan kotuk Japaun deside ona hodi oferese programa asistensia oioin. No projetu hirak ne’e hodi suporta ita boot (Timoroan) sira nia luta hasoru ba Covid-19. Hosi programa asintensia hirak ne’e kuandu tahu hamutuk ho valor orsamentu maizu menus Juta U$16-resin,” dehan Embaxadór Kinefuchi.

Enkuantu iha inisiu Fulan Maiu 2021 ne’e, Embaixadór Japaun iha TL intrega ambulansia no ekipamentus médiku nian. Hanesan; inkubador, kama, kulixaun no material saúde nian ne’ebé espesifiku ba Covid-19 nian.

Tuir observasaun Timor Post, fasilidade saúde ne’ebé Ministériu saúde simu, mak hanesan ambulansin ho tipu SUV. Carrinho Emerjénsia unidade 12. Manometru pressiu marterial unidade 765.

Estetoscopio unidade 765, Autoclave 12 unidades, Incubadora Infantil 10, Bomba Seringa Unidade 18 no monitor kabekeira unidade 70. Ekipamentus hirak ne’e sei utiliza ba hospital referral, hanesan; Baukau, Maubise, Maliana, Covalima no Oe-cuse. Fasilidade balun sei oferese ba isolamentu iha Vera Cruz iha HNGV.(Lee Notisia seluk iha Jornál Timor Post)