Governu husu PR deklara tan EE ba-dala 11 no Suspende Atividade Eskola

by -836 views
Foto: Media MD

Timor Post (19/02/2021)- Governu liu hosi reuniaun Konsellu Ministru, sesta (19/02), deside no husu Prezidente Repúblika (PR), Francisco Guterres Lu’olo halo tan estensaun ba Estadu Emerjénsia (EE) ba-dala-11 hahú Marsu to’o Abríl tinan 2021, no suspende  atividade eskola.

Ministru Prezidensia Konsellu Ministru, Fidelis Leite Magalhaes haktur,  governu foti desizaun ne’e, tanba haree ba númeru covid-19 iha país vizinu indonézia no iha rai laran kontinua aumenta, tanba ne’e iha proposta ne’ebé mak governu haruka ba ne’e husu mós atu suspende hotu atividade eskola iha rai laran, karik Prezidente Repúblika aseita proposta ne’e.

“Governu delibera ona atu propoin ba Prezidente Repúblika, atu halo renovasaun ba estadu emerjénsia ba loron tolunulu tan”, dehan Fidelis Magalhães, iha Palasiu Governu.

Eis Xefe Casa Civil adianta estensaun estadu emerjénsia ne’e nia karakterístika ka natureza sei hanesan ho ida ne’ebé mak agora sei vijente, maibé sei iha espesífiku balun mak sei halo klaru liután.

Nia mensiona ida maka sei husu prezidente atu autoriza F-FDTL atu halo patrullentu hamutuk ho PNTL iha fronteira hodi prevene ema tama sai ilegál, inklui mós iha kláuzula ida atu halo klaru liután kona-ba posibilidade halo suspensaun ba rejime prezensial edukasaun nian.

“Governu tenke suspende atividade hanorin nian tanba ámbitu ba direitu ema labarik nian, iha ona autorizasaun hosi prezidente repúblika kuandu nia konkorda haruka fali ba Parlamentu” dehan Fidelis.

Membru Governu adianta ho renovasaun estadu emerjénsia bele proteje saúde públika no iha kbiit atu hatán ba sistema nasionál saúde nian, liuhosi suspende ka limita direitu fundamental balun atu evita no neutraliza risku sira hosi propagasaun SARS-CoV-2.

Jornalista : Jaime Pires
Editor : Mariano Martins

No More Posts Available.

No more pages to load.