Governu ho ADB Selebra Akordu Impréstimu Millaun $135

by -280 views
Palásiu Governu

Jornalista Jaime Pires / Editór Noémio Falcão

DILI (Timor Post) – Governu lideradu Primeiru Ministru Taur Matan Ruak ho Banku Dezenvolvimentu Aziátiku (ADB sigla Ingles) selebra akordu impréstimu osan millaun $135 iha loron Sesta (01/10/2021).

Total orsamentu ne’e governu impresta atu finansia projetu dezenvolvimentu Aeroportu Internasional Prezidente Nicolau Lobato (AIPNL), Dili.

Ministru Finansas, Rui Augusto Gomes mak hetan kompetensia husi Konsellu Ministru reprezenta Timor-Leste asina akordu ne’e.

Liuhusi komunikadu ne’ebé Timor Post assesu iha pájina ofisiál Gabinete Ministériu Finansas, haktuir, iha loron 15 fulan Setembru tinan 2021, Konsellu Ministrus atribui podér tomak ba Ministru Finansas, Rui Augusto Gomes hodi reprezenta Governu Timor-Leste asina Akordu Empréstimu ho ADB.

Ba faze dahuluk dezenvolvimentu AIPNL, Konsellu Ministrus mós autoriza loke prosedimentu aprovizionamentu tolu ho tipu konkursu públiku internasionál, ba ajudikasaun kontratu públiku ba kontratasaun empreza sira ba konsesaun no konstrusaun, ba fornesimentu servisu supervizaun no jestaun projetu nian.

Entretantu iha loron hanesan selebrasaun kontratu ne’e mos, Vise-Ministru Negósius Estranjeirus no Kooperasaun, Julião da Silva ho Embaixadór Japaun iha Timor-Leste, Masami Kinefuchi, asina troka nota Fundu doasaun milliaun US$44 hodi halo finansiamentu ba konstrusaun terminál foun ba pasajeirus no estasaun eletrisidade dedikadu ba Aeroportu Internasionál Prezidente Nicolau Lobato.

No More Posts Available.

No more pages to load.