Governu Hakotu ona Serka Sanitária iha Fatumea, Kontinua husu Lú Olo Dekreta Estadu Emerjénsia

by -1.219 views

Governu Hakotu ona Serka Sanitária no Konfinamentu Obrigatóriu iha Fatumea

Timor Post (24/03/2021)—Governu liuhusi desizaun konsellu ministru hakotu ona serka sanitária no konfinamentu obrigatóriu iha Postu Administrativu Fatumea, Munisípiu Kovalima. Desizaun ne’e foti bazeia ba relatóriu husi Sentru Integradu Jestaun Krize (SIJK).

Ministru Prezidénsia Konsellu Ministru, Fidelis Leite Magalhães subliña, nia parte foti ona medidas ne’e tanba konsidera SIJK aprejenta relatóriu ho klean kona-ba pontu de situasaun epedimolojia iha Timor Leste.

“Relatóriu husi sentru integradu katak moras iha ne’eba (Fatumea) kontroladu ona. Ho ida ne’e Munisípiu Covalima laiha ona serka sanitária,” Fidelis haktuir ba Jornalista sira hafoin Konsellu Ministru foti desizaun, ohin.

Maske nune’e, konsellu ministru aprova proposta renovasaun Estadu Emerjénsia ne’ebé aprejenta husi Primeiru Ministru Taur Matan Ruak.

“Ho ida ne’e sei hato’o proposta ba Prezidente Repúblika no tuir koridor konstituisaun nian hato’o ba Parlamentu Nasionál, no governu sei aprova medidas sira,” Fidelis hatutan.

Estadu emerjénsia ba dala 12 ne’e tuir proposta governu sei tama iha vigós hahú loron 2 Abril to’o 2 Maiu 2021. (cao)

No More Posts Available.

No more pages to load.