Governu Hakotu Konfinamentu Obrigatóriu iha Dili, Kontinua Serka Munisípiu Lima

by -262 views
Imajen ne’e hatudu edefísiu Ministériu Finansas. Foto Espesiál

Jornalista Jaime Pires / Editór Noémio Falcão

DILI (Timor Post)— Governu liuhusi reuniaun Konsellu Ministru hakotu tiha ona medida konfirnamentu obrigatóriu jerál ka bandu ema sai husi uma iha Dili, maibé mantein serka sanitária iha Munisípiu Baukau, Ermera, Kovalima, Manufahi no Dili.

Durante semana ida aplika konfinamentu obrigatóriu iha Dili, ho desizaun ne’e, populasaun iha kapitál nasaun ne’e livre hahú husi oras, tuku 23:59, loron 9 setembru 2021. No aplikasaun serka sanitária ba munisípiu haat to’o loron 22 setembru 2021.

Ba Jornalista sira iha Edefísiu Ministériu Finansas Aitarak-Laran, Dili, Kuarta (08/09/2021) hafoin desizaun, Ministru Prezidensiál Konsellu Ministru, Fidelis Leite Magalhães subliña, nia parte halo análiza ba aprezentasaun husi pontu situasaun epidemiolójika país, husi koordenadór sira Sala Situasaun Sentru Integradu Jestaun Krize (SIJK) nian molok foti desizaun.

Nia hatutan, hakotu impozisaun serka sanitária iha area sira ne’ebé abranja husi suku Naimeko, postu administrativu Pante Makassar, no husi suku Bobometo, postu administrativu Oesilu, suku rua ne’e iha Rejiaun Administrativa Espesiál Oekusi  Ambenu nian, to’o tuku 23:59, husi loron 8 fulan-setembru tinan 2021.

Nune’e, bandu nafatin tama no sai husi munisípiu Baukau, Kovalima, Dili, Ermera no Manufahi, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

Proibisaun ida-ne’e la abranje ba indivíduu sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompaña indivíduu sira ne’e.

No More Posts Available.

No more pages to load.