Governu Evakua Komunidade iha Sentru Refuziadu ba hela iha “Kos”

by -384 views
Foto Espesial

Jornalista Maria Lízia, Editór Noémio Falcão

Dili (Timor Post)—Governu liuhusi Ministériu Administrasaun Estatal (MAE), Sekretaria Estadu Protesaun Sivíl (SEPS) ho apoiu ekipa husi Bombeiros evakua urjentemente komunidade hamutuk uma kain-9 iha sentru refuziadu Maneluana ba hela iha uma fó aluga (kos) iha área refere.

Parte sira foti medida ne’e tanba udan tau maka’as iha loron Sábadu (13/11/2021) rejulta bee sasurut tama baraka refuziadu sira nian fó impaktu tebes feto no labarik sira ne’ebé durante ne’e laiha uma tanba inundasaun iha loron 4 Abril inísiu tinan 2021.

Foto Espesial

Maske governu nia asaun ne’e salva ona komunidade uma kain-9, maibé sira seluk ne’ebé kontinua terus iha fatin refuziadu lamenta tebes ho atuasaun MAE no SEPS tanba konsideradu laiha koordenasaun servisu.

“Hodikalan sira mai evakua uma kain-9, maibé SEPS dehan lalika muda, MAE hakarak muda ami ba hela iha Kos,” hatete Koordenador Sentru Refuziadu Manleuana, Carlito Exosto Sarmento ba Jornalista sira, Domingu (14/11/2021).

Carlito esplika, pozisaun rua la hanesan tanba tuir MAE hakarak komunidade sira kontinua hela iha fatin refuziadu to’o governu rejolve dala ida transporta ba ida-idak nia munisípiu.

“Ami kontinua hein prosesu prosesu ne’e ba oin,”

Total uma kain ne’ebé hela iha sentru refuziadu Maneluana hamutuk-48.

Carlito hatutan, opsaun ne’ebé governu liuhusi SEPS fó ba sira maka fila ba ida-idak nia munisípiu no hela iha bairro foun.

“Ami hakarak ba bairro-foun tanba sira (governu) rasik maka promete ba ami. Sira mai ho formatu prienxe hotu kedas,” nia hatete.

Nia dehan, governu promete ba sira ne’ebé hakarak ba bairro foun sei kompleta ho fasilidade sira inklui bee moos, meskadu no eskola besik.

“Ami kontinua hein to’o ohin loron fulan ualu ona. Ami hela iha loron manas to’o agora udan fali ona ami la seguru tebes. Inan sira ne’ebé isin-rua no bebe sira toba iha lona okos,” Carlito hatete.

Relasiona ho preokupasaun sira ne’e Timor Post sei konfirma ho parte governu liuliu MAE ho SEPS.

No More Posts Available.

No more pages to load.