Governu Esforsu Hasa’e Pursentu Vasina iha Ermera, Diálogu ho LidKom

by -111 views
Odete Maria Freitas Belo

DILI (Timor Post)Governu liuhusi Ministériu Saúde konsidera partisipasaun povu ba vasina iha Munisípiu Ermera kiik liu kompara ho munisípiu seluk tanba foin atinji pursentu 17.

Tanba ne’e, Ministériu Saúde prepara dadaun diálogu ho Líder Komunitáriu (LidKom) sira iha tempu badak.

“Foin lalais ne’e vise ministru ba iha ne’ebá, pois enkontru ida ne’e ami prepara atu ba fali  hodi halo diálogu atu ko’alia fali ho ita nia lider lokál sira,” Ministra Saúde Odete Maria Freitas Belo ba jornalista sira hafoin reuniaun Konsellu Ministru iha Palásiu Governu, Dili, Kuarta (18/08/2021).

Nia hatete, konsellu sira prontu diálogu fali ho komunidade sira atu bele halo implementasaun ba vasinasaun ne’e iha Ermera.

“Ita espera katak, ita la kohi loke ampolas  ne’e ba  ema  ida de’it, ema ida de’it mak mai entaun  ita bele estraga ai moruk ne’e no ita soe de’it, maibé ida ne’e la’ós akontese dala barak,  akontese dala ruma loron ida akontese iha fasilidade ida”, nia termina.

Aleinde ne’e mós, ministra husu ba sidadaun hotu ho konxiénsia hodi kombate Covid-19 iha Timor-Leste.

“Ita moris ho Covid-19 tinan ida ho balun ona, entaun ita hotu mai ho konxiénsia atu haree atividade sira ne’ebé mak ema sempre halibur malu barak ne’e tenke minimiza tiha, ne’e ha’u hanoin virus ne’e sei la espalla, más ita mak kontinua nafatin halibur malu nafatin moras ne’e sei lasai hosi ita nia rain”, nia haktuir.

Nia haktuir, naran katak tenke kumpre regras ministériu saúde no OMS nia, atu uza máskara, fase liman ho sabaun beibeik, distansiamentu sosiál no evita halibur malu. (mj8)

No More Posts Available.

No more pages to load.