Governu deside Serka Sanitária iha Dili Durante Loron Hitu

by -166 views

Timor Post (08/03/2021)—Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).

Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.

Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.

Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk,  aihan no seguransa.

“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.

Nia hatutan, ba sira ne’ebé husi munisípiu seluk no rejidente iha Dili,  sira bele tama mai Dili maibé tenke relata ba SIJK no kumpri konfinamentu obrigatóriu.

Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.

Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.

“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta.

Atividade eskola no merkadu sira sei hatúr tuir despaixu husi parte relevante  sira sei fó sai.

“Konklui katak atvidade hotu sei paradu durante loron hitu ne’e nia laran,” Fidelis subliña.

Entretantu medida ne’e foti relasiona ho parte SIJK idenfika ema na’in rua nu’udar feen ho lae iha Aldeia Terra Santa, Tasi Tolu hetan ona moras daet COVID-19. No iha loron tuir mai identifika tan estudante ida iha Bebonuk, Dili. (cao)

No More Posts Available.

No more pages to load.