Governu Delibera Proposta ba Estensaun Estadu Emerjénsia iha Fulan Janeiru 2021

by -459 views

Timor Post (21/12/2020)—Governu lideradu Primeiru Ministru Taur Matan Ruak liuhusi Konsellu Ministru delibera ona proposta ba estensaun estadu emerjénsia ba dasia iha fulan Janeiru 2021.

Proposta ne’e sei hato’o ba Prezidente Repúblika hodi husu ba Parlamentu Nasional halo aprovasaun ba deklarasaun estadu emerjénsia.

“Renovasaun estadu emerjénsia ba loron tolunulu tan,” informa Prezidente Konsellu Ministru, Fidelis Leite Magalhães ba Jornalista sira iha Palásiu Governu, Dili, Segunda (21/12/2020).

Fidelis hatete, governu foti desizaun ne’e tanba haree ba evolusaun husi situasaun epidemiolójika no proliferasaun ba kazu rejistadu sira husi kontájiu COVID-19 nian, iha nivel rejionál, no mós iha nivel mundiál, atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian.

Governante ne’e realsa, governu propoin ba Prezidente Repúblika Francisco Guterres Lú Olo katak, ho renovasaun estadu emerjénsia, permite atu suspende ka limita direitu kona-ba sirkulasaun internasionál, husi sirkulasaun no fiksasaun rezidénsia no rezisténsia nian.

Jornalista: Jaime Pires

Editór: Noémio Falcão

No More Posts Available.

No more pages to load.