Governu Buka Meius Atu Lori Fila Timor Oan 72 Iha Israel

by -115 views

Timor Post Online (23/09/2020)- Ministra Negósiu Estranjeiru no Kooperasaun, Adalgisa Magno, hatete oras ne’e daudaun governu buka meius lori estudante 72  iha Israel fila Timor.

“Agora ami buka hela meius atu bele lori fali sira fila mai” informa Adalgisa ba jornalista sira hafoin hala’o audiénsia ho komisaun B iha Parlamentu Nasionál, Kuarta (23/09).

Ministra adianta  sira nia estudu bele remata ona maibé bele kontinua governu bele fasilita tanba sira alende eskola sira serbisu hodi manan osan, sira aprende teknolojia agrikultura nian sira mos manan osan, maibé sira hakarak fila.

 Ministru Agrikultura no Peska (MAP), Pedro dos Reis, mós akresenta komunikasaun la’o hela.

“Agora ami komunikasaun la’o hela, foin lalais ne’e sira atu mai maibé asuntu administrasaun iha Israel mak ‘naran sá uitoan’ maibé  kontinua halo negosiasaun para lori fila sira na’in 72 ne’e mai Timor-Leste,” nia hakotu.

Entretantu timoroan 72 ne’e ba tuir formasaun kona bá teknolojia agrikultura avansadu iha Israel liuhosi kooperasaun bilateral entre rai rua. (Jornalista: Julio Salinas Soares)

No More Posts Available.

No more pages to load.