Governu Aprova Rezolusaun, Planeamentu Familiar

by -1.257 views
Fidelis M Leite
Fidelis M Leite

Dili (Timor Post)- Governu liuhusi reuniaun konsellu Ministru ne’ebé mak lidera husi Vise-Primeira Ministra, Armanda Berta, aprova ona rezolusaun ida hodi ‘bandu’ sidadaun sira halo oan barak.

Ministru Prezidensiál Konsellu Ministru, Fidelis Manuel Leite Magalhaes dehan, projetu rezolusaun governu ne’e aprezenta husi Ministra Saúde, Odete Freitas Belo, ne’ebé aprova Polítika Nasionál kona-ba Planeamentu Familiár, no hetan aprovasaun husi membru Konsellu Ministru.

Nia deklara, polítiku ida ne’e ho objetivu atu adapta konseitu planementu familiár nia ne’ebé ho integradu no apropriadu kulturalmente ho kontextu Timor-Leste.

Nune’e ho konsiderasaun ba kompromisiu polítiku ne’ebé motiva ona adezaun nasionál ba planu asaun konferénsia Internasionál ba populasaun no dezenvolvimentu.

“Planeamentu familiár importante tebes atu hamenus mortalidade inan ho empoderamentu inan-feton sira nia, hanesan liuhusi asaun akonsellamentu jenetiku no konjugál,” dehan Fidelis iha Palásiu Governu, kuarta (09/02).

Nia reforsa, informasaun ba métodu no fornesimentu meius kontrasesaun, tratamentu infertilidade, prevensaun moras husi tranzisaun seksuál no rastreiu kankru jenitál.

“Métodu Planeamentu familiár konstrui mós instrumentu privilejiadu ba defeza saúde inan no oan, prevensaun ba abortu no defeza saúde no kualidade moris família sira nia,” Fidelis hateten.

“Ezisténsia husi proposta ida ne’e mak oinsá ita hotu garante atu iha família sira iha oan bele kontrola no bele halo espasu entre oan sira, no labele oan sira barak liu forma husi sira nia kbi’it rasik,” Nia hakotu.

Jornalista: Jaime Pires

No More Posts Available.

No more pages to load.