Governu Aprova Medida Foun ba Ezekusaun Estadu Emerjénsia

by -585 views
Palásiu Governu

Jornalista Jaime Pires / Editór Noémio Falcão

DILI (Timor Post)—Governu liuhusi  reuniaun konsellu ministru aprova medida foun ba ezekusaun estadu emerjénsia. Alterasaun ba dekretu lei 21/2021, loron 7 fulan Agostu ne’e ejize liu tan Polisia Nasionál Timor Leste (PNTL) atu halo intervensaun ba regra hotu ne’ebé estadu hatúr.

Ministru Prezidénsia Konsellu Ministru (MPKM), Fidelis Leite Magalhães ba Jornalista sira hafoin reuniaun konsellu ministru, iha Palásiu Governu, Kinta (09/09/2021) subliña, PNTL tenke halo fiskalizasaun ba medida sira kuandu iha atividade halibur ema barak.

“La kumpri regra prokolu saúde nian, PNTL sira iha dever atu halo intervensaun iha atividade sira hodi husu para hirak ne’ebé mak halo atividade ne’e kumpri regra sira,” Fidelis hatete.

Nia subliña, medida foun ne’e foti hodi kontrola sidadaun sira ne’ebé mak sai perigu iha tempu Covid-19 nian, atu nune’e halo distansimentu sosial ba kualker atividade sira ne’ebé mak komunidade sira halo.

Antes ne’e Komandante Operasaun Nasionál PNTL, Superintendente Xefe Pedro da Costa afirma, sei kontinua kumpri orientasaun sira no halo identifikasaun ba sidadaun ne’ebé halibur ema barak.

“Agora orientasaun ne’e klaru kedas, tuir rezolusaun ne’ebé fó sai katak iha mate uma, ema na’in sanulu de’it, labele liu ida ne’e. Kuandu liu ida ne’e, sira kontra ona regras, entaun presija tenke halo identifikasaun ba sira ne’ebé mak hanesan ba halibur malu iha fatin ne’ebé maka rame,” Pedro Belo subliña. (Lee notísia seluk iha Jornal Timor Post)

No More Posts Available.

No more pages to load.