Governu Aprosima Família Uma Kain 131 iha Sentru Evakuasaun Fila ba Munisípiu

by -548 views
Sekretáriu Estadu Protesaun Sivíl, Joaquim Gusmão Reis Martins

Estajiáriu MJ7 / Editór Noémio Falcão

DILI (Timor Post)— Sekretáriu Estadu Protesaun Sivíl, Joaquim Gusmão Reis Martins haktuir, nia parte halo daudaun aprosimasaun ho família uma kain hamutuk 131 ne’ebé sai vítima iha dezastre naturál loron 4 Abril liu ba atu fila ba ida-idak nia munisípiu.

Joaquim hatete, família hirak ne’e to’o agora sei hela iha sentru evakuasaun sira iha Dili tanba sira nia uma laiha total iha momentu dezastre natural mota no rai halai sobu total.

Governante ne’e subliña, durante fulan hirak nia laran família sira kontinua hela iha lona okos ne’e sai preokupasaun boot maibé solusaun ideal maka bainhira governu fó ona apoiu osan no material sira tenke hela duni iha fatin seguru.

Nia hatete, ameasa La Nina tuir predisaun metolojia Austrália no Amérika katak udan boot iha fulan Outubru to’o tinan oin ne’e bele mosu tan dezastre naturál. Tanba ne’e, se família sira iha sentru evakuasaun labele fila tan ba sira nia hela fatin ne’ebé besik mota no rai lolon.

Nia hatutan, bainhira família sira ne’e hakarak fila ba ida-idak nia munisípiu maka governu fó apoiu hahán, material konstrusaun no transporte hodi fasilita sira to’o fatin ne’ebé sira hakarak hela.

“Karik ita fó ajuda sira mak sira halo nafatin uma iha foho lolon ho mota ninin ita la próteze sira nia vida. Entaun atu próteze sira nia vida ita hasai husi fatin evakuasaun ne’e tenke ba fatin ne’ebé seguru ba sira,” Joaquim subliña. (Lee notísia seluk iha Jornal Timor Post)

No More Posts Available.

No more pages to load.