Gabinete PM Lidera Vasina Massal

by -812 views
Orariu Vasina AstraZeneca massal iha Dili ne'ebé sei hala'o iha loron, Segunda, (10/05/2021)

(Reportájem Suzana Cardoso)

DILI (Timor Post) – Hafoin Governu Australianu oferese vasina AstraZeneca ho dosis rihun 20 iha loron 05 Maiu 2021, Governu Timor-Leste (TL) halo esforsu fó vasina ba komunidade hodi asegura sira nia imunidade.

Tuir informasaun ne’ebé Timor Post asesu hosi Ministeiru Asuntus Parlamentares no Komunikasaun Sosiál (Mapkoms) hateten, Segunda, (10/5/2021) ne’e Gabinete Primeiru Ministru (PM) sei lidera vasina AstraZeneca massal iha Dili.

Programa vasinasaun massal ne’e realiza tanba servisu hamutuk entre liña ministeriál ne’ebé sei hala’o tuir total ekipa.

Iha Becora hamutuk ekipa haat maka hala’o vasinasaun ba komunidade hosi Suku Kuluhun no Bidau Sta. Ana ho total komunidade ne’ebé sei simu vasina hamutuk nain 2.426.

Vasinasaun hanesan sei halao iha Suku Comoro ho ninia sentru iha aldeia 34. Ho total tarjetu komunidade ne’ebé simu vasinasaun hamutuk nain 3.222 no idade 60 ba leten hamutuk nain 1.822 no total ekipa haat.

Iha fali fatin sira ne’ebé nia total populasaun kiik hanesan bairru Formosa, sei akumula ho Suku Gricenfor no Suku Oriental ho komunidade hosi aldeia 13 ho total tarjetu simu vasinasaun hamutuk nain 1.588 ho total ekipa saúde haat.

Ekipa vasinasaun ho total lima sira mós sei vasina iha Vera Cruz ne’ebé sei akumula hosi aldeia 25 ne’ebé mai hosi Suku Vila verde, Caicoli no Lahane Ocidental ho total tarjetu komunidade ne’ebé sei simu vasina ne’e hamutuk nain 2.888.

Total ekipa rua sei desloka ba Metinaro hodi halo vasinasaun ba aldeia Ualu hosi Suku Sabuli no Suku Wenunuk ho tarjetu komunided ne’ebé sei simu vasinasaun ne’e hamutuk 414.

Tarjetu vasinasaun ne’e ba komunidade ne’ebé ho idade 60 ba leten nomos sira ne’ebé hetan moras todan. Maibé husu komunidade hotu-hotu atu kolabora para mai simu vasina ne’e hodi Timor-Leste livre lalais hosi Covid-19.

Tuir dadus ne’ebé Timor Post asesu katak hamutuk Timoroan nain 28.678 maka simu ona vasina AstraZeneca. Hein katak ho vasina massal ne’e bele fó imunidade ba komunidade hodi livre hosi Covid-19.(Lee orariu iha jornál Timor Post)

No More Posts Available.

No more pages to load.