Fura Mina Matan Feto Kmaus ho Liurai Suai, Esforsu Veteranu no Xanana Gusmão

by -1.496 views
Imajen ne’e hatudu Primeiru Ministru Taur Matan Ruak ho partisipante hotu ba serimónia lansamentu perfurasaun mina no gas iha rai maran Kovalima, kari aifunan ba monumentu masakre Setembru Negro 1999 Suai hafoin misa. Foto TP: Jeremias Soares

Jornalista Jeremias Soares / Editór Noémio Falcão

KOVALIMA (Timor Post)—Relasiona ho lansamentu perfurasaun petrolifera iha Posu Feto Kmaus no Liuria Suai Kovalima, Tenente Jenerál F-FDTL Lere Anan Timur no Prezidente Konsellu Kombatente Libertasaun Nasional Vidal de Jesus Riak Leman, husu ba veteranus sira tenke hamutuk.

Lere hatete, durante funu libertasaun pátria, maluk barak mate no fakar-ran, mak ohin loron Timor-Leste bele sai nasaun no povu ida, ne’ebé mak ho ninia tradisaun rasik, nune’e husu ba matebian sira atu tau mantan nafatin ba servisu ne’ebé mak atu hala’o, tanba ida ne’e mak mehi eroi sira nian.

“Ita tane nafatin ita-nia matebian sira, sei tau matan no tulun ita nafatin, buat ne’ebé ita hakarak no mehi sei to, ne’e mak husu ba veteranu sira, apartir husi ita-nia Primeiru Ministru, Prezidente, Maun Xanana, Ramos Horta no Mari, ita tenke hamutuk buka malu”, Lere hato’o asuntu ne’e iha ambitu selebrasaun kultura fó onra ba eroi no martires inklui hasa’e naan lulik iha Monumentu Masakre Setembru Negro 1999 Suai-Kovalima, tersa (26/10) kalan.

Lere agradese ba veteranu sira, tanba halo esforsu makas hodi ko’alia ho veteranu sira husi Australia, nune’e ikus mai realiza duni perfurasaun ne’e.

“Ha’u nia parabéns ba veteranu sira, ne’ebé mak loron-kalan hanoin ba Australia kontaktu ita-nia maluk veteranu sira, ha’u hanoin importante liu mak ita tenke hamutuk, tanba riku soin Timor ita-nian, ita labele fó fatin ema seluk esplora fali, ida ne’e mak importante, tanba ita funu tanba ida ne’e, no ita-nia maluk sira mate tanba ida ne’e”. Lere afirma.

Iha fatin hanesan, Vidal Riak Leman, hatete veteranu sira halo funu hodi defende Timor-Leste ho nia riku soin sira. Mina iha tasi laran mak agora abastese veteranu no terseira idade sira, inklui halo dezenvovimentu a-nivel nasionál, tanba ne’e ho perfurasaun posu rua ne’e Povu tomak no veteranu sira sei hetan benefisiu.

Esforsu veteranu Australia ho veteranu sira husi Timor-Leste nian, mak hodi konsege halo akordu ho kompañia ne’ebé mak fura mina, iha momentu sestu Governu nia tempu, Xanana Gusmão hanesan Ministru Planeamentu Investimentu Estratejiku.

“Veteranu sira husi Timor-Leste ba beibeik Australia, no Australia mós mai iha Timor-Leste, sira-nia esforsu mak ohin ita bele konkretiza iha Oitavu Governu atu fura mina ida ne’e”,  Riak Leman afirma.

Riak Leman husu ba konsellu veteranu munisipal Suai, atu koopera ho Estadu no Autoridade sira, inklui kompañia ne’ebé atu fura mina.

“Ita nia dezenvolvimentu ne’e atu la’o, husu ba veteranu sira unidade no unidade, hamutuk ho ita-nia Povu, para fó seguransa didi’ak ba ita-nia mina ne’ebé atu fura”. Riak subliña.

No More Posts Available.

No more pages to load.