Fura Bee Mós, Bee Nafurin Mak Mosu

by -780 views
Bee sulin nakrotok tarutu ho suar sai hosi mangeira hansean Gas.

(Reportajen Luis Casmeiro/Editora Suzana Cardoso)

Fatuberliu (Timor Post) – Fura bee mós durante loron tolu, badaen hakfodak ho  bee nafurin mak suar sa’e hosi rai kuak hodi obriga lori sunu koko to’o ahi naburun kedas sai hosi mangeira bee nian.

“Hafoin bee sa’e ho nafurin no suar sa’e mai gas. Ami lori eskeru baku ba ahi naburun kedas. Hosi fenomenál ne’e maka bolu kedas autoridade suku, postu administrativu  no polisia hodi mai haree diretamente.”

Lia fuan hirak ne’e esplika hosi badaen fura bee moos António Soares ba Timor Post iha Same, Domingo (24/04).

Nia hateten, fenomenál ne’e deteta hafoin sira fura bee matan iha rai tetuk ida ne’ebé lokaliza iha natar kulu, Suku Klakok, Postu Administrativu Fatuberliu, Munisípiu Manufahi hodi fasilita bee ba armajen hahán Eis Ministra Justisa IV Governu Konstitusionál, Lucia Lobato nian iha Fatuberliu.

Esplika badaen António, servisu fura bee ne’e hala’o durante loron tolu ona. Tama ba loron datoluk, Sábadu, (23/04/2022) tun ba okos metru 42 derrepente bee nafurin suar sa’e.  Tanba loro kraik ona maka husik hela de’it.

“Maibé ohin atu ba tiru hodi hetan bee moos, derrepente bee sulin nakrotok tarutu ho suar sai hosi mangeira. Nune’e mak ami baku ahi ba naburun kedas hosi mangeira bee sulin sai ne’e,” dehan António.

Iha parte seluk Komandante Polísia Nasionál Timor-Leste (PNTL) Eskuadra Fatuberliu, Inspetór Asistente Julio Couto Baptista ne’ebé haree ona fatin ne’e hateten, tuir informasaun ne’ebé hato’o mai PNTL katak,  hafoin fura bee ba uma privadu ida to’o hatún besi kuaze lolon hitu tun ba rai kuak mak bee sai mai ho gás dala ida.

Inspetór Asistente Julio esplika, temporariumente PNTL Eskuadra Fatuberliu dada tiha ona pita liña polisia (Police line-Inglés) ba fatin refere. No atividade fura bee iha ne’ebá pendente lai hodi hein instrusaun tuir mai.

“Asuntu ne’e ha’u informa ona ba komandu polísia Distritu Manufahi no autoridade Postu Administrativu Fatuberliu no sira mós informa ona ba administradór Munisípiu Manufahi.  Hein de’it instrusaun tuir mai. Maibé provizoriumente atividade seidauk bele hala’o, “ katak Inspetór Asistente Julio.

Tuir video badak ho durasaun minutu ida liu, ne’ebé Timor Post asesu, komunidade hafoin rona badaen hetan gás,  sira sunu hodi koko ba suar ho bee ne’ebé sai hosi mangeira ahi lakan ho naburun boot.(Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.