Funsionáriu Na’in-181 Seidauk Tuir Teste ba Promosaun Karreira

by -578 views
Foto Espesial

DILI (Timor Post)—Prosesu implementasaun rejime karreira ba kandidatu Funsionáriu Públiku sira, tanba ne’e na’in-1.361 tuir ona teste, maibé na’in-181 seidauk tuir teste ba promosaun grau.

Diretora Nasionál Forsa Traballu no Mobilidade Funsaun Publika, Anita Tavares Ribeiro de Jesus, konta teste promosaun rejime karreira kandidatu hamutuk 8706, kompostu hosi feto 2.214 no mane 6.492.

“Funsionáriu públiku hamutuk 1.361 tuir tiha ona teste no na’in-181 mak seidauk tuir teste promosaun grau,” informa Anita ba Timor Post iha edifísiu Komisaun Funsaun Públika, Kuarta (27/10).

Kandidatu hamutuk na’in 8706 fahe tuir grau, grau B 373, C 1.169 D 1.885 E 2.557 F 1.722 no G 100. Ema hirak ne’e tuir teste iha turnu tolu kada turnu kandidatu 100.

“Relasiona ho pandemia Covid-19 ita tenke hamenus kandidatu kada turnu tanba atu aplika distansiamentu sosiál”, nia esplika.

Prosesu kona-ba teste ne’e, agora tama ona iha grau B ba A ema na’in-321 tuir tiha ona teste. Hosi númeru ne’e na’in-52 mak seidauk tuir ho razaun sei halo pedidu ba oráriu teste nian.

Grau C ba B ema na’in-1.169, maibé 1.040 tuir tiha ona teste no seidauk tuir teste hamutuk na’in 129. Númeru hirak ne’e iha ema balun halo pedidu atu hadi’a kalendáriu teste.

Aleinde kona-ba Funsionáriu Públiku ne’ebé kolokadu iha estranjeiru, hanesan embaixadór no tékniku asesu teste ne’e liuhosi online.

Ministériu Negósiu Estranjeiru no Kooperasaun ninia kandidatu hamutuk na’in-38. Hosi númeru ne’e na’in-15 mak tuir tiha ona teste, iha grau B ba A kandidatu 8 no C ba B kandidatu 7.

Komisaun Funsaun Publika informa ona ba kandidatura ne’ebé to’o agora seidauk tuir teste promosaun karreira, liuhosi portal komisaun nian no informa ona ba rekursu umanu atu taka sira-nia naran.

Komisaun Funsaun Públika lakohi ema ida atu lakon nia direitu promosaun karreira, tanba ne’e presiza asesu informasaun atu bele kompete. (kyt)

No More Posts Available.

No more pages to load.