Fundasaun Mahein Kontra Deputadu KHUNTO hakarak Tiru Sidadaun Sira Tama Ilegal husi Fronteira

by -107 views

Timor Post (28//01/2021)- Diretór Fundasaun Mahein (FM), João Almeida, hatete, la nesesáriu autoriza Polisia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) atu tiru sidadaun sira ne’ebé mak tama fronteira ilegál.

Almeida hatete atu kriminaliza kazu sidadaun sira ne’ebé mak tama ilegál ladún los tanba sidadaun timoroan ne’ebé iha rai li’ur iha diretu atu hetan próteze.

 “Sira ita hare hanesan abandona tanba estadu la hola medida ida ne’ebé mak nesesáriu atu fó protesaun ba sira, entaun sidadaun sira ne’ebé mak iha indonézia  úniku solusaun ba sira mak tenke tama ilegál, entaun bainhira sira tama ilegál atu kriminaliza sira ne’e la nesesáriu karik”, dehan Almeida iha nia servisu fatin, Bairru Sentrál, Kinta (28/01), hatán ba deklarasaun bankada Khunto nian iha PN.

Almeida hatutan sira ne’ebé mak tama ilegál mak ba subar  ne’e buat ketak ida, tenke regulariza tuir lei haruka.

Nia hatutan  liga ho deklarasaun deputadu katak atu estende estadu emerjensia ba dala 10 ho medida tiru nia hanoin la fasil hanesan deputadu sira ko’alia.

“Tiru ne’e iha ninia regra, bainhira mak tiru no iha sirkunstánsia saida mak atu tiru, tanba PNTL, F-FDTL rasik mós iha ona ninia regras oinsá atu bele utiliza armas”, hatán Almeida.

Entretantu iha debate autorizasaun estensaun estadu emerjénsia Kuarta (27/01) Xefe Bankada Khunto Olinda Guterres dezafia forsa no PNTL tiru sidadaun ne’ebé kontra bandu iha fronteira.(Jaime Pires, Editor Mariano Martins)

No More Posts Available.

No more pages to load.